الجمعة، أغسطس 08، 2008

سكوووووب...مركز البيوتكنولوجي

وبعد غياااااااااااااااب طويل عن ابنتي البكرية سكووووبي ...اعود من جديد


النهاردة هنعمل فوكس عن مركز البيوتكنولوجي اللي قارفاكم بيه في حبة صمت ..المشكلة انه حبيت اعمل سيرش عنه في النت ملقيتش حاجة عنه خالص غير في موقع الكلية وكاتبين عنه سطرين يتيمين ...مع ان المركز يا جماعة بجد من اهم المراكز علي مستوي مصر كلها اللي بيتعمل فيه شغل البيولوجيا الجزيئية علي مستوي عالي ..وبيدرب الخريجين والباحثين وبيخرج منه ابحاث كتير..ده غير طبعا الكورس اللي عملوه لينا احنا الطلبة


المركز موجود في كلية الطب البيطري جامعة القاهرة ...مبني المدرجات الدور التالت علي ايدك اليمين...في احلي من كده وصف؟؟ :))

مكون من معملين وغرفة التحضير وغرفة تصوير ضوئي..ومكتب مدير المركز في اخر الطرقة وانت رايح علي قسم الفيروسات كده

اول لما دخلت المعمل فوجئت بكمية اجهزة.. مش ممكن.. وتمنها غاااااااااااااااااالي قوووووووي...واصلا احنا كنا قارفين الدكتورة اللي بتشتغل معانا في عيشتها كل شوية نسألها ايه ده يا دكتور ...طب ده بيعمل ايه..اما كنت حاسة انها خلاص هتفرقع مننا..ههههههههههههههههههههههههههههههههههه


دي الصورة الوحيدة اللي لقيتها في موقع الكلية عن المركز







علي فكرة ده يبقي دكتور جمال العيسوي ..دكتور عندنا في قسم الفسيولوجي..الجهاز اللي واقف قدامه ده اسمهCentrifuge

الجهاز ده لما بيبقي عندنا عينة وعايزين نفصل مكوناتها بندخلها فيه وندورها لمدة معينة وبعد كده بنخرج العينة وبتكون محتوياتها منفصلة عن


بعض..او لو عندنا عينة مثلا وبعض مكوناتها بتبقي لازقة في جدار الانبوبة بندخلها في الجهاز ده بحيث ان الجدار يبقي مش عليه حاجة

وكل الكمية بتاعة العينة تبقي مترسبة في الانبوبة



والبتاعة اللي ماسكها في ايده دي اسمها Pipette ودي في منها اشكال وانواع بنستخدمها في اخذ العينة او المحلول اي كان الحاجة اللي بنستخدمها بالكمية اللي احنا بنحددها ..وكل شغلنا كان بالميكرو ليتر







اخر صورة دي multi-channel pipette ..يعني بنستخدمها لما يكون معانا عينات كتير اختصارا للوقت..لو تلاحظوا ان الراجل ساحب في كل التيبس نفس الكمية بالظبط..وده طبعا دليل علي مهارة عمو اللي في الصورة ..اصلا كانت بتحصل مواقف مضحكة واحنا بنشتغل بالبيبت دي


الكورس كان مدته ستة ايام ..بجد كانوا من احلي الايام اللي قضيتها في الكلية...يكفي ان في حرية في المعاملة بينك وبين الدكتور..لانك اصلا جاي تتعلم بمزاجك ..فتقرف الدكتور زي ما انت عايز ..وهو اصلا هيتقبل رخامتك دي لانه هو كمان جاي يشتغل في المركز بمزاجه وحابب الشغل فيه



اليوم الاول



الساعة 9:51 بالظبط كنت دخلت المعمل ...بجد مش قادرة اوصف شعوري اول لما دخلت ..كان نفسي ادخله من زمان واعرف الناس دي بتعمل ايه..بعدها بشوية دخل دكتور مجدي غنيم هو دكتور في قسم الكيمياء الحيوية ..اخدنا محاضرة عن الحامض النووي ..انا كنت قاعدة بسمع المحاضرة دي للمرة الخمسين ...فطبعا اعمل ايه بقي لقيتني كل شوية بنااام ..واقوم صاحية مرة واحدة ..وانام واصحي ..انام واصحي...وفوجئت بعد الدكتور ما خلص ان مش انا لوحدي اللي كنت بنام لاااااااااااااااااااااااااااااااا ده صحابي كلهم كده ..قلت الحمد لله مش انا لوحدي...اخدنا بريك ..وبعد كده روحنا المعمل التاني واتقسمنا مجموعات ..مجموعتي كانت ستة ..واصلا احنا كنا الستة الوحيدين اللي من سنة تانية ...وكل مجموعة بيقف معاها دكتور...كانت معانا في اليوم ده دكتورة نهي ..لسة بتحضر في الدكتوراة بتاعتها ..هي في قسم الباثولوجيا الاكلينيكية...بس دكتورة طيبة اوي وزي العسل



كان اليوم ده معنييين فيه بعزل الDNA وعزلناه والحمد لله...بس ايه بقي احنا اصلا ناس واصلة عزلناه في تلات ساعات وهو اصلا بياخد تلات ايام..ههههههههههههههههههههههههههههههههه...اينعم احنا عزلناه فعلا ..وطلعنا بالنتيجة اننا شفناه بجد في الانبوبة ..بس طبعا مكانش بيور اوي ..او مينفعش يجي حد ورانا يشتغل عليه بحث..اهم حاجة ان احنا عرفنا خطوات العزل بتتم ازاي ...ودي كانت الطريقة الاولي وهي طريقة ال phenol chloroform




اليوم التاني


دخل فيه دكتور محمد وحيد ..دكتور في قسم الامراض المشتركة..كلمنا عن طريقة اخري لعزل ال DNA وهي طريقة ال Kits يعني ايه؟؟؟؟؟

يعني ببساطة الكيت دي علبة كده وفيها شوية محاليل المحاليل دي هي بس اللي هنستخدمها يعني مش هنجيب اي حاجة تاني برة الكيت دي ودي طبعا اسهل واوفر في الوقت بكتير من الطريقة الاولي بس مكلفة شوية..مش مكلفة اوي يعني الكيت الواحدة بحوالي 2500 جنية :))..ده طبعا ارخص كيت انما في كيتس تانية..بلاش اتكلم احسن


وبعدها بشوية روحنا المعمل التاني عشان نعزل الحامض النووي بطريقة الكيت ...وبعدها بقي هما كانوا محضرين DNA معزول بيور عشان نعمل عليه تفاعل ال PCR

عشان نعمل تفاعل ال PCR بنستخدم مجموعة من المحاليل والانزيمات والحاجات دي بحيث يوصل حجمها في النهاية لـ 50 ميكرو ليتر..انتوا متخيلين معايا يعني ايه 50 ميكرو ليتر ..يعني نقطة تقريبا او نقطتين...طبعا جنااااااااااااان رسمي..بس عملناه برضه وله ابيندورف مخصوصة عشان تتعمل فيه ..صغنونة اوي اوي اوي










الجهازين دول بالظبط زي اللي عندنا في المركز ..واللي فوق ده حديث جداااااااااااااااااا..بيشتغل باللمس ملوش زراير



اليوم التالت

بعد اما عزلنا الحامض النووي ..وعملنا تفاعل ال PCR المفروض بقي اننا نشوف الدي ان ايه اللي طلع عندنا ده ونعرف طوله قد ايه وهل هو فعلا ده الدي ان ايه اللي احنا بندور عليه ولا لا ....عشان كده كان لازم نعمل حاجة اسمها Agarose gel electrophoresis


اليوم ده بقي وقف معانا دكتور خالد من قسم الباثولوجيا الاكلينيكية...نفس النظام برضه دكتور متعاون وبيفهم براحة ..واشتغلنا حلو والحمد لله...وبعدها بشوية بعد اما خلصنا التجربة ..رحنا علي غرفة التصوير الضوئي عشان نشوف النتيجة بتاعة شغلنا...وقبل اما ندخل كان فيه تحذيرات جامدة جداااااااااااااااا..ليه؟؟ ...اصل احنا هنشوف الباندات بتاعة الدي ان ايه عن طريق الاشعة فوق البنفسجية..ودي طبعا اللي يتعرضلها مباشرة تعمله بلاوي متلتلة...والظاهر كده العيال صحابي كانوا عايزين يخلصوا مني اليوم ده..بالذات هالة سكشن :))






ده الجهاز اللي استخدمناه في اليوم ده


وده بقي شكل الباندات بتاعة الدي ان ايه بعد اما سلطنا عليها الاشعة فوق البنفسجية...وبالظبط كده الاوضة كانت ضلمة زي ما انتم شايفين والباندات منورة كده

اليوم الرابع بقي كان اطول يوم في الكورس ..مشينا من المعمل الساعة 8 وربع...بس بيني وبينكم كان احلي يوم ..اصل انا بحب اروح بالليل اووووووووووي ..

اليوم الرابع والخامس والسادس ..كنا بنشتغل في حاجة تانية خالص بعيدة عن ال DNA اسمها الـ serology الموضوع ده احنا بتوع تانية مكناش فاهمينه اوي عشان لسة هناخده في تالتة ان شاء الله..بس فهمنا شوية يعني الحمد لله..وفهمنا اكتر في الشغل العملي

خامس يوم نسيت نضارتي العزيزة في البيت...طبعا مقلكوش ع الحوسة اللي كنت فيها ...وطبعا كل الناس كانت متعاطفة معايا..وانا كنت حاسة في اليوم ده بالعجز...بجد ..وقعدت قدام السبورة وبرضه مكنتش شايفة كويس...بس الحمد لله اليوم عدي علي خير بدون اي خسائر.

اليوم السادس بقي كان فيه حفلة صغنططة كده المركز عملها لينا ..والعميد سلمنا الشهادات..وبعد كده كل واحد اخد طبق الحلويات بتاعه والحاجة الساقعة وفضل ياكل...طبعا طبعا سفروتة ولا خلصت الطبق بتاعها ولا الحاجة الساقعة..وده شئ مش جديد عليها وانتوا عارفين طبعا كده كويس

اجمل حاجة في الكورس اني كنت مع صحابي ..مكانش معانا حد من اللي مش بنطيقهم...اتعلمت حاجات جديدة واساسيات هتفيدني بعدين..عرفت دكاترة بجد بجد اقل ما يقال عليهم انهم محترمين اوي وطيبين اوي وعندهم علم نفسهم ينفعونا بيه

شكر لكل الدكاترة اللي شفتهم علي مدار الستة ايام

د/وحيد موسي...قسم الطفيليات ..ومدير المركز حاليا

د/وليد عواد..قسم الامراض المعدية

د/محمد وحيد...قسم الامراض المشتركة

د/عادل خليل...قسم البثولوجيا الاكلينيكية

د/مجدي غنيم..قسم الكيمياء الحيوية.... والراجل ده كان له مجهودات عظيمة افاد بيها المركز

د/خالد..قسم الباثولوجيا الاكلينيكية

د/حسين...قسم الميكرو بيولوجي

د/احمد البحيري..قسم الطفيليات

د/نهي..قسم الباثولوجيا الاكلينيكية

الحاجة بقي اللي كانت مضايقاني اوي في المركز....البلاطة المكسورة اللي في اول المعمل وانت داخل علي ايدك اليمين كده...كانت بلاطة ملخلخة كده وبتعمل صوت فظييييييييييييع...كنت بضايق منها اوي..ونسيت اكتب الملحوظة دي في ورقة التقييم في اخر يوم...اتمني انهم ياخدوا بالهم...بس متهيألي هما اتعودوا عليها

سفاريت المركز كانوا : نوران ..ايمان ..هالة .......... وطبعا كان معانا انجي ونهلة وهبة

كان معانا كمان من سنة خامسة محمد لمااااااااااااضة....بيسأل كتير اوي ...بس ما شاء الله عليه حد فاهم كويس اوي ..واخر يوم دكتور وليد قاله قوم اشرح لزمايلك اللي في سنة تانية كذا كذا...قام شرحلنا وكانت طريقة شرحه جميلة

وكان معانا برضه اية من سنة خامسة ..كانت بتحب تقعد من قدام ...ومتحبش حد يقعد قدامها..غريبة

كنا 29 طالب من خامسة ورابعة وتانية

دي كانت جولة بسيطة اوي اوي اوي وحاجة مختصرة جداااااااااااااااااااااااااااااا عن اللي حصل في الستة ايام بتوع الكورس

اتمني اني اكون افدتكم بشئ

كانت معكم

السفروتة نوران

19 اللي شاركوني منظاري:

EMMY BABY يقول...

هههههههههههه طريقة عرضك فظيعة بجد بتحسسنى انى كنت معاكم

بالرغم ان البوست طويل الا انى مملتش وانا بقراه خالص وده دليل على ابداع منك

نسيتى تقولى ان كلكم اتصورتوا مع بعض فى الاخر هههههههههه

خليها عليا المرة دى

بجد ربنا يوفقك والحمد لله انك حققتى حلمك واستفدتى منه وكانت تجربة ممتعة بالنسبة لك وكنتى مع اصحابك كمان

تحياتى

مامتك ايمى

سفروتة يقول...

ايمي بيبي
..........

ههههههههههههههههههههههههههههه

كنت افتكرت ان احنا اتصورنا لو كنت حصلت علي صورة واحدة يتيمة من اللي اتصورتها


هبقي اعمل تحديث لما الصور توصلني

.............

ربنا يخليكي يا مامتي علي ثنائك الجميل ده

بنتك الصغننة
سفروتة

ساجي يقول...

بجد استفدت
رغم اني عارف حاجات عن الموضوع
بس بجد مع الصور وهم تاني
ربنا يجازيكي خير
وألف مبروك انك طلعتي م المود بسرعه
موش بقلك سفروته عنيده وقويه الشخصيه
ربنا يباركلك ويوفقك لكل خير
سلام

سفروتة يقول...

ساجي
........

الحمد لله انك استفدت

والصور عجبتك كمان

ومتشكرة لثنائك علي سفروتة

دمت بكل خير مصطفي

تحياتي
:)

abo salah يقول...

بعد السلام عليكم


ربنا يوفقك دايما يارب
ومن نجاح لنجاح

وبجد معلومات قيمة فكرتينى بمادة الاحياء بتاعت الثانوية العامة
بس الاحياء طلعت اسهل بكتييييير
ههههههههههههههههههه

اجمل ما فى الايام دى بتكون الصحبة فعلا

ربنا يوفقك

صحيح
من هالة سكشن دى ؟
ههههههههههههههههه


تحياتى

Tamer Alhosiny يقول...

عزيزتي السفروتة
والله رحلة اكتر من رائعة وبست هايل انا حاسس بتعب كبير جدا في عمله
اولا وصفك لعنوان المعمل اكثر من رائع
هتخليني افكر اجي ازوره منغير ما اتوه
ههههههههههههههههه

رغم التفاعلات الاي اتكلمتي عنها
والمصطلاحات الاسلوب بجد قرب لينا الفكرة
بس انا زعلت انك نسيتي البلاطة المكسورة في الايفلويشن بتاعك
ده تعليقي علي الموضوع بشكل عام
اما عن الرحلة دي
فده لازم يكون له رد هو كمان

تحياتي
تامر الحسيني
انسان عاشق حر

سفروتة يقول...

abo salah
............

بعد وعليكم السلام ورحمة الله

ربنا يخليك يا ابو صلاح

...

ههههههههههههههههه الاحياء دي اصلا تعتبر عنوان في وسط الكتب اللي بندرسها

...

اكيد طبعا الواحد لما بيبقي وسط اصحابه بيحس بمتعة وانه مش لوحده

...

هالة سكشن دي تبقي هالة صاحبتي ..وانا مسمياها كده نسبة الي اسمها اللي متسجل عندي ع الموبايل
هههههههههههههههههههههههههههه

اصل انا اعرف اتنين هالة وبفرقهم بكده

...

تحياتي
:)

سفروتة يقول...

تامر الحسيني
.............

الحمد لله ان الرحلة عجبتك...والظاهر كده انك كنت حاسس بيا فعلا لاني بجد تعبت اوي علي ما كتبت البوست ده..عشان احاول اقربلكم الموقف بعيدا عن الجو العلمي بس برضه مقدرتش هههههههههههههههههه ...لازم يبقي فيه مصطلحات في النص

....

يا فندم انت تنور المركز ..هههههههههههههههههههههه..كويس ان العنوان اللي كتبته ميتوهش

...

انا كمان زعلت اوي اني نسيت اكتب في ورقة التقييم عن البلاطة لانها بجد كانت مضايقاني جدااااااااااااااااااااااااااااااااااااااااااااااااااااااااااا

....

ربنا يخليك يا تامر

ودايما منور سكوووووبي

تحياتي
:)

Ahmed Al-Sabbagh يقول...

ياهوووووو

اخيرا لقيت حد فى عالم التدوين بيشاركنى اهتمامى ده

اعرفك بنفسى

خريج زراعة القاهرة قسم بيوتكونولوجى

والادهى من كدة ان مجال عملى هو الأجهزة العلمية

يعنى كنت ببلع بيبتتين على الريق وبتغدى بـ بى سى آر

بجد جمييييييل اوى

انا مبسوط ومنشكح

وهتابع دايما

احمد

سفروتة يقول...

خالو احمد الصباغ
.................

والله نورت المدونة بتشريفك ليها

وانا كمان فرحانة جداااااااااااااااااااااااااااااااا اني لقيت حد زي حضرتك مهتم بالبيوتكنولوجي
ده انا علي كده ممكن اعمل معاك شغل جامد
يللا استعد بقي
:))

نورت يا خال

طوبة ذهب وطوبة فضة يقول...

الموضوع طويل بس جميل اوى فكرتينى بالذى مضى واعادتى على سمعى اسماء كل الدكاتره اللى بحبهم بجد ربنا يوفقك ياقمر

سفروتة يقول...

طوبة دهب وطوبة فضة
...................
نورتيني بجد يا دهب في بيتي الاولاني

يااااااااااااااااااااااااااااااااااااااااااااااااااااااااااه والله يا دهب انا حاسة اني اعرفك من مان معرفش ليه
بس اول لما عرفت انك كنتي من رفاق الكفاح والله فرحت جدااااااااااااااااااااا
يللا يا ستي اي خدمة فكرتك بالدكاترة اهه
وفعلا كل اللي ذكرتهم دول فئة محترمة جداااااااااااااااااااااااا ..ربنا يكرمهم يارب

تحياتي يا ثكر

Rooma Qandil يقول...

salam alikom

بت يا سفروتة
ما تكتبي عن الامتحانات الي احنا بتفعص فيها
اخر حاجة كتبتيها البوست ده
سيبك من رغيك قصدي من كلامك العسل
د.جمال عسيوي
بجد دكتور محترم فحط وجااامد

يلا منتظرين بوستك القادم ان شاء الله

سفروتة يقول...

ROOMA QANDIL
..............
بنت يا رووما
هنتكلم عن الامتحانات ان شاء الله في النشرة

فعلا عندك حق في كلامك عن دكتور جمال

وعودا احمدا للتدوين

:)

اقصوصه يقول...

تقرير ممتع وجميل

سعدت بالمرور

مودتي :)

Abo-Harees يقول...

السلام عليكم
وكل سنه وانتى طيبه واهل المنصورة كلهم بخير وطيبين
على فكره سردك وشرحك ده جميل ومفيد لكل الناس

الراعى

أبــــو ضـــيــاء يقول...

حبيت امر واقولك كل سنه وانتي طيبه

وتعود عليكي الايم بالخير

غير معرف يقول...

Hi,

I begin on internet with a directory

غير معرف يقول...

جميل والله ربنا يباركلك فكرتين


ي بالكلية وبالدكاترة الجمال اللي كنت أحبهم وأكن لهم كل الإحترام والتقدير
وخصوصا د.وحيدوكمان فرحت لما عرفت إنه أصبح رئيس القسم.ربنا يباركله يجزيه خيرا
على فكرة أنا دفعة2002.اسمي عزة حسن