الخميس، أبريل 24، 2008

سكوووووب...خنقونا ،خنقونا،خنقوناااااااا

خيشة....شحيبر....زعبولا

تلات شخصيات ناوين علي قضانا انا والفتيات صحباتي ...هما سفروتيات زيي علي فكرة


السيد شحيبر صديق زعبولا من زمان ،وانضم ليهم مؤخرا السيد خيشة





انا عارفة انكم مش فاهمين حاجة



نعمل فوكس اكبر




دول تلات ولاد زمايلنا في السكشن(ولو انهم ميستحقوش لقب الزمالة) ...بجد مش عارفة اقول عليهم ايه..انعدام الذوق...قمة الرخامة ...التناحة..مفيش جنتلة،تقريبا فكرهم عن البنات انهم اخرتهم الجواز والقعاد في البيت








بكره جدااااااا يوم الاتنين لانه بيبقي عندنا فيه سكشن بارا والتلاتة دول بقي بيعملوا احتلال علي الميكرسكوب ومبنعرفش نشوف العينات منهم




يقوم السيد خيشة شادد الكرسي وقاعد عليه وعمنا شحيبر وعمنا زعبولا يفضلوا واقفين وراه زي البودي جارد كده ويفضل حضرته يصور في العينة بالموبايل بتاعه قرن من الزمان ولو حب ممكن يخليهم قرنين مفيش مانع (اصل احنا عودناهم علي كده) ويطلع في روحنا علي بال ما يتعتع من علي الميكرسكوب (اصله هيكتشف حاجة جديدة)




ويتكرم علينا ويخلينا نشوف العينة


في يوم من ذات الايام (ويارتنا ما كنا بذلنا المجهود ده في الكلام معاهم)كانوا عاملين الاحتلال اياه ،تشجعنا وقولنالهم لو سمحتم عايزين نشوف العينة ....قام السيد خيشة بكل بجاحة قالنا احنا بنصور العينة....يا بجاحتك يا اخي ..يا بجاحتك ..مفيش ذوق خالص


ماشي هنعمل احنا اللي عندنا ذوق ...لفينا تاني علي عينات المعمل كلها ورجعنا للعينة دي وهما لسة واقفين ....ياسااااااااااااااااتر ...انا كان بيتهيألي اني هقلع الكوتشي واديهم بيه علي دماغاتهم ...وعمالة ااف اف وازعق ..واقول للعيال اصحابي انا لفيت عينات المعمل كلها خمس مرات وفاضل العينة دي وبتكلم بصوت عالي عشان يحسوا علي دمهم شوية ...وهما مفيش خالص..ولا حياة لمن تنادي



واللي يغيظ بقي يا سادة ..انهم دايما بيبصولنا بنظرات غريبة..كل اما نروح حتة نلاقيهم في وشنا بخلاف ولاد السكشن كلهم...وزعبولا ده عليه حتة بصة من تحت النضارة بتاعته مش عارفة افسرها علي انها نظرة احتقار ولا حقد ولا قرفان مننا ولا ايه بالظبط


طب لو انتم مضايقين مننا في حاجة ..قولولنا عليها وبلاش النظرات الغريبة دي ..بدل ما انتوا خنقتونا كده وهتجيبلونا الضغط والسكر والشلل السداسي عن قريب


طب بلاش سكشن البارا.....سكشن الفسيولوجي كان نازل فيه عينات ومعاها الكومينت بتاعها ...فانا واصحابي كنا قاعدين بنكتب كومينت احدي العينات ...وفجاة لقينا ورقة الكومينت اتشدت من عندنا وراحت في حتة بعيدة شوية ...اتاري الاخ خيشة شدها عشان يصورها بالموبايل ...انا بقي اتنرفزت وشديتها عندنا تاني....اصله بصراحة معندوش ذوق ولا قال بعد اذنكم هصورها ولا اي حاجة


المصيبة بقي ان اساميهم قريبة مننا في الكشف ...يعني لو اتحطينا في مجموعات بحثية ممكن يبقوا معانا...لااااااااااااااااا مش متخيلة الموقف ...ربنا ما يحطنا في الموقف ده ابدااااااااااا


طب افرض بعد ما اتخرجنا ان شاء الله لاقينا حد منهم اشتغل في نفس المكان اللي واحدة فينا هتشتغل فيه ان شاء الله يعني ،هتفضل نفس العداوة دي كده بينا ...المنظر مش هيبقي لطيف خاااااااااااالص...ان شاء الله مش هيحصل


بس احنا مش هنسيب الهيمنة الذكورية دي تستمر ابداااااااااااااااااااا


استعد يا خيشة انت وشحيبر وزعبولا .....السفروتيااااااااااااااااات قاااااااااادماااااااااااات



ربنا يهديهم


قولوا آاااااااااااااااااااااااااااامين




18 اللي شاركوني منظاري:

Tamer Alhosiny يقول...

اساميكم قريبه من شحيبر وزعبولا وخيشه
انتم اكيد اساميكم
ست ابوها وانهار و عدلات

هههههههههههههههههههههه

يا رجال العالم اتحدوا
بفكر في انشاء مدونه لمكافحة التمييز ضد الرجل

والاي يضحك قوي السفروتات قادمات
نفسي اعرف قادمات منين
اكيد من البلاعه

هههههههههههههههههههههههه

Tamer Alhosiny يقول...

NO Safareet NO Cry

دعوه لكل الرجال استخدام احدث منتجات
البرفيوم العالمي فليت للقضاء نهائيا علي السفاريت

ههههههههههههههههههههههههه

الجميل في حكاية السفروتات انهم بيفكروني بالسنافر
بتوع زمان في افلام الكارتون
الواحده فيهم قد عقلة الصباع
ومنتظره شاب يديها لقب انسه

ههههههههههههههههههههههههه


عفوا يا سفاريت كافة الخطوط مشغوله
رجاء عدم الاتصال لاحقا يا سفاريت

اوكي كفايه كده النهارضه
لحسن خلاص مش هتبقوا سفاريت
كده هتختفوا خالص


تامر الحسيني
مدون ضد السفروتات

تامر الحسيني يقول...

اعزائي السفاريت
نظرا لتحديكم للمساكين شحيبر وزعبولا وخيشه ونظرا لتخفيكم وراء شعار لا للهيمنه الذكوريه
فاني اعلن من هنا اني اتحدي السفاريت
واقف بكل ما املك من طاقات ضد الحركات السفروتيه الناهضة للذكوره
واعلن من هنا
ان كان في هنا حد من الطائفه السفروتيه
يوريني نفسه
ويقف يواجهني لاعلن الحرب عليه
وذلك في غضون 24 ساعه
في حالة عدم الظهور اعلا اسقاط الفكر السفاريتي نهائيا
وانتصار لمباديء الحريه العالميه

تامر الحسيني
مدون ضد السفروتات

زى الهوا يقول...

والله لو عملوا ايه , خلاص يعنى التفوق واخد حده معاهم , فلتحيا السفروتات , وتسقط الهيمنة الزكورية , سلامتك م الخنقة ياسفروتة ياصغنونة

عمرو وجيه يقول...

هههههههههههههههههه


انا عارف انتى تقصدى مين وانا كمان عرفهم ...



بس بجد هما طيبين جدا بس هما رخمين شويتين ..



بس بجد اللى يرخم عليكى رخمى عليه ...


انا عارف انهم شلة رخمة بس بجد اللى يقرب منهم يعرف انهم اكتر ناس جدعان فى الكلية دى ....

bar2ash يقول...

السلام عليكم

ازيك يا سفروته

اتحفظ بشده علي الاختلاط اصلا في السكاشن لان مفيش حد بياخد حريته

لكن مادام كان غصب عنكم يبقي اصبروا وان شاء الله ربنا اما يهديهم او يهدهم


تقبلي مروري

برقش

سفروتة يقول...

تامر الحسيني
او زي ما بيقول
مدون ضد السفروتااااات

............................

ااااااااااااااااااااااه يا قلبي

كل ده

ليه
حرام
ولمين
فين
ازاااااااااااااااااااي

طبعا انا كنت متابعة كومينتات سيادتكم من اول ما حطيتها في المدونة
ولكن نظرا لظروف الامتحانات القهرية البحتة انا قلت ارد عليك بعد الامتحانات

طبعا زمانك دلوقتي عمال تقول للرجالةانك قضيت علي حزب السفاريت وانه انهار وانه وانه

لكن اسمحلي حضرتك اني اقول لك ان السفاريت لا ممكن ...مستحيل...اطلاقا

انهم ينهاروا

ما عاش ولا كان ولا هيكون

اللي يقول علينا كده

بس ايه ده يا تامر

كل ده كره بتكنه للسفروتات

عملولك ايه طيب يعني

اعااااااااااااااااااااااااااا

ده احنا غلابة وفي حالنا

سيدي الفاضل اسمح لي ان انقل لك كلمة السفروتات ردا علي خطبة حضرتك
قصدي التلات خطب الطوال العراض دول

احم احم

ايها السادة

والان مع كلمة زعيمة حزب السفروتات

سفروتة هانم

( طــــــــــــظ في الرجـــالـــة )

معذرة معشر الرجال فانا لا اقصدكم جميعكم ولكن انا اقصد من هم دائما يرفعون شعار "الهيمنة الذكورية"ويريدون انا يروا المرأة مجرد كائن مكسور ذليل لرغباتهم وتوجيهاتهم...من يريدون ان يجعلوا منا اداة في ايديهم ...من لا يريدون ان يروا بصماتنا في مجالات العلوم...من..من...من

كفاكم هذا

_______________________________

اااااااااااااااااااااااااااااااه

حرام عليك يا تامر خلتني اكتب كل ده ايديا وجعتني

:)))))))))))))))))))))

منور والله

متحرمناش بجد من طلتك

كل التحية

أية الشقية الشعنونة يقول...

ال يعنى انتى فالحة يا سفروتة
وهما اللى معطلينك
هههههههههههههههه
بغلس عليكى
ولازم تتعلمى الغلاسة زيى كده
وتبقى بجحة عشان مبقاش ينفع تتكسفى فى حقك والامش هتاخديه
هههههههههههههههه
هع هع هع
تحياتى وبتمنى لك التوفيق

سفروتة يقول...

زي الهوااااااا
...............

منوراني يا مساندة حزب السفروتات

ابعتي انتي بس اسمك بالكامل وصورتك والايميل

واحنا هنبعتلك الاي دي بتاع الحزب

:)

سفروتة يقول...

عمرو وجيه
...........

انت عارف لو قلتلك انا قعدت اضحك قد ايه لما شفت تعليقك هنا مش هتصدقني

بس مفتكرش انك عرفتهم بالاسم ..انا عارفة انك عارف الشلة

بس التلاتة بالظبط اشك

عشان بس اهدي وارتاح ابقي قولي مين اللي جم في بالك

وبعدين حكاية اللي يرخم عليكي دي رخمي عليه مفتكرش انها جابت نتيجة

خير خير

احنا لينا تصرف تاني معاااااهم

نورت يا عمرو

سفروتة يقول...

برقش
.........

حكاية الاختلاط مش عاملة معانا مشكلة في السكشن لان في ولاد كتير جدااااا بجد محترمين وبيقدروا وذوق جدااااااااا

باستثناء اللي اتكلمت عنهم في البوست

فزي ما انت قلت كده بالظبط

ربنا يهديهم يارب

نورت سكووووب

سفروتة يقول...

اية الشقية الشعنونة
........................

تصدقي مكنتش هاخد بالي خااااااالص من الكومينت بتاعك اصله وصل وقت ما انا كنت برد علي الكومينتات

المهم يا ستي غلسي برااااااااااااااااااااحتك

هههههههههههههههههههههههه

وبعدين هو زي ما قلتي كده لاااااازم وحتما ولابد ابقي بجحة زي ما هما بجحين كده معانا

تحياتي يا باشا

ومنورة سكووووبي

3abratalsabeel يقول...

بتفكرينى بواحد برضه كان معانا فى اولى كلية كان بنفس الغباء ده كنا كلنا بنتخنق منه وكان فاكر الكلية كليته والمدرج مدرجه ويقعد فى اى مكان فى حتة هو عايزها

بس الفرق بقى بينى وبينكم انه رحمنا منه بعد اول سنة الحمد لله
عقبالكم

سفروتة يقول...

عابرة السبيل
...............

منورة الحزب السفاريتي وارض سكوووووبي

الحمد لله ان ربنا رحمكم منه

احنا بقي اللي لسة هنفضل في الموال ده تلات سنين قداااااااااااام

الحقيقة انا لا املك غير اني اقول

ربنا يهديهم بجدددددددددد


شرفت بمرورك

:)

ليكوريكا يقول...

لا لا لا لا

بجدددددددددد مشششششششششش هسسسسسسسسسسسسسكت

طب انتو عندكم خيشه وشحيبر وزعبولا

معلش يعني

احنا بنبقي 3 او اربع ولاد في السكشن والباقي كله بنات

بنبقي زي المشردين يعيني

البنات بيحتلوا الميكروسكوبات

وبيفرجونا بالعافيه

احنا اقليييييييه ومضطهده كمان

ده حتي ي امتحانات الشفوي بندخل لازم بعد البنات كلهم

يارب ييجي اليوم ونبقي زي زعبوللا وشحيبر وخيشه افندي :(((

سفروتة يقول...

ليكوريكا
...........

ايه يا عم ليكوريكا مالك هدي نفسك مش كده

الانفعال مش كويس عشانك

شوفت اهه اللي بيتعمل فيكم نفس اللي بيتعمل فينا

لينا حق بقي نطالب بجلااااااااااااااااااااااااااااااااااااااااااااااااااااااااااااء الهيمنة الذكورية ولا لأ؟؟؟؟؟

اهه احنا بقي بنتجنب ندخل معاهم في الشفوي خاااااااااااااااالص

نورت يا ليكو :))

عروسة ننوسة يقول...

البوست هايل

دموع القمر يقول...

ازيك سفروتة

كل سنة وانت طيبة

سعيدة بزيارتى للمدونة


اكون اسعد لما تنورينى اكيد