الأحد، أبريل 06، 2008

سكوووووب....اضراب 6 ابريل

يوم 5 ابريل
الساعة 11 مساءا حدثت مناقشات ومباحثات عنيفة بيني انا سفروتة من جهة ومامتي وبابايا من جهة تانية ،كل ده بسبب انهم مش عايزيني اروح الكلية يوم 6ابريل خوفا من ان يكون هناك ضرب ورشاشات مياه وقنابل دموعية واروح انا في الرجلين ، وخلصت الخناقة علي اني هروووح يعني هروووح ....ان شاء الله اموت اهو يبقي اسمي شهيدة برضه.
يوم 6 ابريل
صحيت الساعة خمسة ونص صباحا ولسة هقوم من ع السرير سمعت صوت ماما وبابا في الصالة قلت بس انا لو قمت دلوقتي هتحصل خناقة وهنلم الجيران والخناقة مش هتخلص حتي لو جابوا مزيكة حسب الله، قلت يا بت يا سفروتة خديها من قصيرها ونامي دلوقتي وبعدين ربنا يحلها وطبعا مش هاين عليا اسيب محاضرة الفسيولوجي.
الساعة عشرة صباحا كان هاتفي الخلوي يشير الي انه هناك مكالمة من "هالة سكشن" دي هالة صاحبتي ومعايا في السكشن ، المهم كلمتها وبتقولي يا بنتي تعالي ده مفيش حاجة وكمان اخدنا محاضرة الفسيولوجي،وانا بقي كنت هعيط في التليفون وهي بتقولي كده، المهم قمت بقي لبست وفطرت وصحيت بابا
سفروتة : بابا .....هات المصروف
بابا : ليه ..... انتي نازلة؟
سفروتة : ايوة عشان تعرف بس انه مفيش حاجة وكمان محاضرة الفسيولوجي ضاعت عليا
بابا : طب خلاص ...بس ابقي خلي موبايلك مفتوح عشان نطمن عليكي وبلاش سايلنت يا نوراااااااااااااااااان
سفروتة : حاضر حاضر ....بس ابقوا اتصلوا بيا بعد الساعة خمسة .. مش معقول يعني اخلي تليفوني يرن وسط السكشن واتهزأ
بابا : طيب.... خلي بالك من نفسك
سفروتة : حاضر ... سلاااام
الشارع يوم 6 ابريل
توقعت وانا نازلة اني مش هلاقي مواصلات ، والشوارع هتبقي فاضية ،لكن كان العكس تماما ، حركة السير زي ما هي ، بدءا من عندنا في امبابة مرورا بالمحكمة وشارع عرابي ثم جامع مصطفي محمود"اللي الاشارة عنده كانت شغالة تمام والعساكر بتوع المرور كانوا بيؤدوا عملهم عادي جدااااااا" ، وكمان شارع البطل احمد عبد العزيز كان عادي جداااا كل الحكاية بس ان الشوارع كانت فاضية جدااااااا ، والعربيات ماشية براحتها، لحد اما وصلنا عند الجامعة وهنا بقي المنظر مكانش لطيف خالص....عربيات الامن المركزي في كل حتة وزهرة اللوتس كانت محاطة بسور حديد كده وواقف وراه ناس كتير ، لكن حركة الطلبة كانت عادية ، والموضوع مشي هادي لحد اما وصلت الكلية في ميدان الجيزة
اللي بس عايزة افهمه ،هو وبعد الاضراب اللي حصل ده"ده اذا كان اضراب ملحوظ" هيحصل ايه ،ايه اللي هيتغير؟!!!!!
كانت معكم
سفروتة اسعد
لقطاع المدونين

8 اللي شاركوني منظاري:

O S A M A يقول...

ان شاء الله هيحصل كتير ياسفروووته لان الشعوب هى اللى بتغير النظام
والنظام خلاص طغي لحد ما الشعب زهق وتعب ومل

وان شاء الله هيحصل تغيير قريب اوى

على فكره الاضراب الجاى يوم 4 مايو يوم عيدميلاد حد عزيز علينا كلنا وكلنا بنحبه ياترى مين؟؟

اللى يعرف يتصل بـــ 0900 اكيد كلكم هتكسبو ياحلووووووووين


تحياتى على البوست الجميل دا

شاب نفسة يحقق حلمة يقول...

انتي في كلية ايه في ميدان الجيزة بالظبط زراعة ولا طب بيطري ياريت اعرف
ممكن
علشان انا في واحدة منهم
تحياتي ليكي

سفروتة يقول...

اسامة
.........

ايه الغيبة الطويلة دي انا قلت انت خلاص بقي قاطعت عالم النت

يللا الحمد لله انك بخير

بس ايه الكومينت اللي يودي اللومان عدل ده
هههههههههههههههههههههههههههههههه

اكيد عيد ميلادك ده يا اسامة (وش مطلع لسانه)

سعيدة بعودتك مجددا

تحياتي

:)

سفروتة يقول...

شاب نفسه يحقق حلمه
....................

انا يا فندم في طب بيطري

Wireless يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Wireless, I hope you enjoy. The address is http://wireless-brasil.blogspot.com. A hug.

s@gi يقول...

ياااااهوووه
وصلت يا جدعان لمدونه سفروته بعد طول تخبط .. مبروك عليا
سكوباتك متنوعه .. وروحها واحده
ربنا يكون ف عون أصحابك .. اكيد بطنهم بتوجعهم م الضحك الهستيرى
ع العموم .. ويلكم باك .. وشدى حيلك يا سفروته ف المذاكره .. علشان عايزين تقدير الترم ده . اه مش هنقضيها بايو وبكاءات
سلامى ودعواتى كتير

ما تعرفيش صحيح أوشن صاحبتك
خدت قرار الاختفاء ليه
هيا شوطه يا جدعان وأصابت قطاع المدونين
ايه يا سالى ؟؟ مضربه ؟؟؟
عفوا ً لقد نفذ رصيدكم يرجى الجلوس على كتاب الباثو لقرب الامتحان
سلامى للجميع

سفروتة يقول...

ياااااااااااااااااااااااااااااااه

اخيراااا لقد ظهر المدعو ساجي

ايه يا دكتور مصطفي فينك

خلاص سيادتك قفلت الخرعبلات وكمان شيلت الكومينتس من 45 يوم

عموما دي حرية شخصية

الحمد لله انك بخير وظهرت في عالم سفروتة مرة اخري

متحرمناش بقي زياراتك

اما بالنسبة لاوشن فانا والله معرفش ايه سبب الاختفاء المفاجئ ده،بجد انا قلقانة عليهاااا جداااااااااااااا
ياريت تظهر هي كمان في عالم سفروتة عشان اطمن عليها

متشكرة اوي يا مصطفي علي تعليقك

تحياتي

Tamer Alhosiny يقول...

عزيزتي سفروته
اشكرك علي الموضوع الجيد
لكن انا رايي بصراحه عملته في موضوع تحت عنوان وجهة نظر
في مدونتي
انسان عاشق حر
http://teeblogspot.blogspot.com/2008/04/blog-post_25.html
اتمني تلاقي فيه رد علي سؤالك