الأحد، يناير 27، 2008

سكوووووب....نوران الطفلة

نوران:النهاردة يا جماعة فكرت اني اعمل سكوب علي نفسي


نور : ايه ده... هو انتي استأذنتيني قبل اما تعملي كده؟!!


نوران:جري ايه يا بنتي ..هو مش احنا واحد ولا ايه؟


نور : اه صحيح ..فاتتني دي..طب كملي يا أنا


نوران: معلهش يا جماعة انا بتحب دايما تتخانق معايا.. المهم يعني هحكي علي شوية مواقف كده كل اما افتكرها اضحك قوي واقول يخرب عقلك يا بت يا نوران

نور : يخرب عقلك يا بت يا نوران..هههههههههههههههههههه

نوران: ظريفة قوي ..علي فكرة الناس ابتدت تتخنق مننا

نور : اه انا حاسة كده برضه

نوران:خلاص هنبدأ اهه



(1)


بمناسبة ان معرض الكتاب بيقام حاليا ...افتكرت موقف ليا وانا صغيرة وكنت رحت مع بابا المعرض مش فاكرة وقتها كنت في اولي او تانية ابتدائي..المهم بابا كان بيشتري كتاب والله ما فاكرة عنوانه كان ايه بس هو كان كتاب في التاريخ بس اللي فاكراه بقي ان سعره كان بخمسة وعشرين جنيه..وبابا جاي بيدفع الفلوس قمت انا طلعت كده وكنت حاجة مش باينة من الارض وقلت للراجل


مفيش تخفيض؟؟؟؟


بكل براءة...قام الراجل قال لبابا طب والله عشان خاطر الامورة الصغيرة احنا هنعمل تخفيض واخدنا الكتاب ب 18 جنيه


اي حد بقي يا جماعة لو عايز تخفيض يبعتلي بس وانا اقوم بالواجب




(2)






دي وانا في ملاهي سفنكس كان عندي سنتين وقتها .. ملاهي سفنكس دي بقي تقريبا كنت مقيمة فيها...كنت بروحها كتير قووووووي

بس للاسف هي مش موجودة دلوقتي عملوا مكانها كوبري..المهم كنت فاكرة موقف كده لما رحت في يوم مع ماما واليوم ده كان الصبحية مكانش بالليل ولقيت الملاهي فاضية خالص ومفيهاش حد غير انا وماما .. المهم كنت هموت واركب لعبة الطيارة اللي بتلف كده ورا بعضيها دي وركبتها وركبت ماما معايا ..وقتها ماما كانت حامل في اخويا ..واول ما عمو شغل اللعبة وانا هيصت بقي وماما كانت حاسة انها دايخة وانا ولا انا هنا وعمالة بقي اقول لعمو زود السرعة شوية ..لحد اما سمعت صوت ماما بتقولي نورااااااااااااااااااااااااااااااااااااااااااااااااان ..كفاية انا تعبت...... والله يا جماعة اول اما افتكر الموقف ده اضحك علي نفسي جدااااا اصله انا اللي غصبت علي ماما تركب معايا ويا عيني هي مرضيتش تزعلني ... والنتيجة انها كانت تعبت جامد...بس الحمد لله اليوم دي عدي علي خير
قوية ومفترية انا

(3)
دي بقي وانا في الحضانة .. افتكر انه كان عندنا في اخر الفصل دولاب كده كبييير كنت كل يوم افتحه واقعد العب في الحاجات اللي فيه كان فيه العاب وعرايس والميس كانت بتحط فيه الزرع بتاعنا اللي كنا بنزرعه ..وكنت اقعد العب في زرع العيال وكنت مبهدلة الدنيا بصراحة
افتكر بقي انه في يوم جات الميس وقالتلنا يا اولاد في مسابقة في الرسم واحسن رسمة هتاخد جايزة ..المهم الابداع الفني ظهر وعمل عمايله معايا وقال ايه رسمت فرح ورقاصة (اه والله رقاصة) وسبت كرسي العروسة والعريس فاضي ..قال ايه لسة مجوش ..وبعد انتهاء اليوم الدراسي ماما جات تاخدني فالميس بتوريها انا رسمت ايه .زومامام تقوللي كده يا نوران ترسمي رقاصة؟؟؟؟؟ والميس تضحك وتقولها ده ابداع ....نتيجة هذا الابداع يا سادة فازت رسمتي انا بالمركز الاول علي مستوي الادارة .ززبصراحة شئ غير متوقع يعني رقاصة وفرح ومركز اول تيجي ازاي دي؟ ورحت بقي عشان اخد شهادة التقدير وسلمت علي ناس كبار قوي في الادارة وناس كده عواجيز وكان فيه
موجه لغة عربية ساعتها قعد جنبي واداني ملبسة كانت بطعم الفراولة وبعدين قالولي بتعرفي تغني ؟قولتلهم طبعاااااااا وغنيت بقي وقلبت الادارة فرح ..ههههههههههههههههه زي الرسمة
في يوم بقي الميس بتاعتنا قالتلنا انها حامل وكانت تقعد تقولنا انها هتجيب نون صغير ويكبر ويبقي قدنا ومش عارف ايه واحنا كنا نفضل نقولها احكيلنا يا ميس عن النونو ..المهم فكرت في يوم كده وقلت طب اجيب ايه للنونو بتاع الميس..وفضلت افكر افكر ...وقلت بس انا اجيب علبة عصير للنونو اهه يشربها لما يكبر....اه والله بجد انا كنت فظيعة....لا والميس ايه فرحت بيا خالص وحضنتي وباستني كمان
بتاخدني علي قد عقلي ولا ايه؟؟؟
نوران بقي لما كانت بتبقي قاعدة في البيت ...ساعات كنت اتخيل اني بقدم برنامج طبق اليوم ....وكنت اجيب كل فوانيس رمضان اللي كانت عندي وافكها واعملها بقي اكنها اطباق وكوبايات وخلاط ومش عارفة ايه...بصراحة كنت عايشة في دنيا تانية
بس حقيقي كل اما افتكر اني كنت بعمل كده كنت بقول
يخرب عقلك يا بت يا نوران

13 اللي شاركوني منظاري:

Tamer Alhosiny يقول...

والله يا نوران مش عارف اقولك ايه
الطفوله فعلا اجمل مرحله في حيات الانسان
انا فضلت اضحك قوي علي التخفيض
والراقصه الاي رسمتيها والحجات الجميله دي بجد تجنن
وعلشان التعليق كمان مش يبقا تقليدي زي الموضوع ما هو مش تقليدي
انا هحكي عن موقف من طفولتي وهعمل عليه اسكوب علي طريقتك
الموقف ده حدث وانا في تانيه ابتدائي ولم اتذكره منذ حدوثه غير الان بعد قرائتي للموضوع ده
انا بقا كنت مصاب تقريبا بالذاهيمر المبكر في الطفوله وكنت علطول انسي الكتب في المدرسه وتضيع مني
وفي يوم نسيت كالعاده كتاب اللغه العربيه للمره الخامسه في نفس العام
ولاني في الاربع مرات القبل كده كنت ببقا زعلان قوي من نظرة والدي ليه لما يعرف اني نسيت الكتاب بتاعي قررت انها متحصلش للمره الخامسه
وقعدت افكر في اني لو سيبت البيت وبعت لبابا رسالة اعتزار اني ضيعت الكتاب هيبقا ده افضل حل لكن لما فكرت هعمل ايه وهروح فين لما اسيب البيت مش لاقيت غير اني اشتغل واصرف علي نفسي وجه في خيالي علطول صورة بليه ودي صورة صبي الميكانيكي في الاعلانات بتاع التلفزيون واذاي هشتغل صبي ميكانيكي والاسطي هيضربني وبعدين اهرب منه وبعدين مش هلاقي اي مكان اروحه ولا فلوس اشتري بيها اكل فهبقا لص واتعلم السرقه وبعدين يتقبض عليه
وادخل السجن لص صغير اطلع منه حرامي كبير وبعدين اهجم علي البنك واسرقه علشان اسافر امريكا وابقا مليونير
ويتقبض عليه وانا بسرق البنك ويتحكم عليه بالاعدام
وقبل ما يتحكم عليه بالاعدام علطول
يواجهوني باسرتي وبابا يزعل مني قوي لاني طلعت مجرم ولان الحل ده مش كان حل كويس وكان صعب حبتين قررت اختصار المسافه والانتحار
بس قلت شوية عقل يا تامر اصبر لحد بكره واسئل اصحابك في المدرسه علي الكتاب واخدت معايا برشام للصداع
وسئلت زمايلي ومش حد شاف الكتاب خالص فاستئذنت للخروج وخرجت من الفصل
واخدت 10 حبات من حبوب الصداع
وبعدين يدوب لسه راجع الفصل قابلت واحد صاحبي قالي انه بعد ما مشيت لقي كتاب العربي بتاعي بعد ما خرجت من الفصل وطبعا اخدت منه الكتاب والدموع هتفر من عنيه
معلش يا جماعه سامحوني كنت طفل غريب شويه المهم دخلت الفصل وحكيت للمدرسه اني انتحرت فكرتني بهزر لحد ما جسمي برد قوي ورحت المستشفي وعملت غسيل معده
والعاقبه لديكم في المسرات

frake_ghost يقول...

السلام عليكم
بصراحه الحوار بينك وبين نور كان فعلا قرب يخنقنى وكنت هغادر أرض سكوب خالص
بس لما فضيتى الغشتباك تابعت
**
الموقف الأول ..جميل بس مش شايفه بيضحك صراحه ..بس باين إنك لمضه من زمان
جريئه يعنى
**
الموقف التانى ..الفلاش مبيض الصوره شويه مبينه بنت قمر كده ..بس اتفضحت بقه فى الضفاير فى الصوره اللى بعدها
ع العموم ..مش يافه برده يضحك
بس بيدل على براءه شديده ..وغنك غلباويه من يومك
***
الموقف الثالث ده بقه مشكله تانيه فعلا يضحك
بقه يا نوران عصير للنونو ..الله اكبر
بيدل على سعه تفكيرك وذكاء حاد منذ نعومه اظفارك
- وحوار الرقاصه والغنا ده ربنا يستر
بس فنانه وذات حس مرهف كمان
**
الموقف الرابع ..بجد ده جنان بقه مصممه مبدعه ..الطفل اللى يعمل حار الفوانيس ده يبقى فنان
بس كان فى لعبه مكعبات كده اسمها ميكانو تقريبا ..كانت ميله وبنعمل منها بيوت وفيلل وإنسان آلى وبتاع
بس مطبخ وطبق اليوم ده خرافه بجد
***
الإسكوب ده ناجح جدا ومعمول بكل براءه وتلقائيه
بجد ربنا يديم عليك نعمته
إنتى بتاع كله يا نوران
جميل انك لسه فاكره ذكريات الطفوله
***
مبروك المدونه الجديده صحيح
تحياتى

frake_ghost يقول...

تحديث صغنن
الموقف بتاع تامر بجد تحفه
10 برشامات صداع ..دا انت تموت فيها يا بنى
وبجد انت كان خيالك واسع
رجعتونا لأيام الطفوله يا ولاه
تحياتى لك يا تامر على شجاعتك وخيالك بجد

noury يقول...

تامر الحسيني
................
اولا :متشكرة خاااااالص

ثانيا : انت بجد طلعت فعلا خيالك واسع زي ما قال مصطفي

لا وكمان فكرت في الانتحار ...وكمان 10 حبات صدااع ايه الجنان ده يا ربي

بس بجد انا كنت هموت علي روحي من الضحك
موقف تحفة بجد
علي الله بس الزهايمر ده ميكونش مستمر معاك لحد دلوقتي

تحياتي
والعاقبة عندكم في المسرات

noury يقول...

ساجي باشا
.........
معلهش بقي هقولك باسمك القديم عشان الاسم الجديد ده بصراحة مش نازلي من زور
...................................
حقيقي انا عجبني في تعليقك انك مفصفص كل حاجة وبتتكلم بالتفصيل الشديد واضح انك شخصية بتحب تهتم بادق التفاصيلن وبتحب تحلل كل حاجة كبيرة او صغيرة

المهم اول موقفين دول انت قلت انك مش ضحكت عليهم لانك وببساطة مكنتش موجود ساعة الموقف لما حصل انا لما بضحك عليهم بضحك جاااااااااااااااااااامد جدا لاني فاكرة شكلي وقتها كان عامل ازاي
يعني انا لما قلت للراجل مفيش تخفيض انا قلتها بطريقة عجيبة اصلا
ولما كنت راكبة الطيارة فاكرة كويس قوي ان وقتها كنت عاملة زي قراصنة البحار والشرار طالع من عنيهم وهما بيديروا دفة السفينة

بس دي كل الحكاية

اشكرك جدااا يا مصطفي
و
الله يبارك فيك

تحياتي
بس دي كل الحكاية

oceaneyes يقول...

ههههههههههههههههههههههههههههههههه


مش معقولة يا نور ..لالالالالا


انا بجد اتخيلتك فى كل موقف من المواقف دى ..وبجد كان شكلك عسل فى كل موقف فيهم


يخرب عقلك يا بت يا نوران !!!


هههههههههههههههههههههههههه



بجد ضحكتينى من القلب فعلا

وحشتينى كتييير يا جميل

ابقى طمنينى عليكى

تحياتى


:)

أحمد منتصر يقول...

إنتي شقية أوي

ابن حـجـر الـعـسـقـلانـى يقول...

الله .. حكايات ممتعة جدا .. و كمان أسلوبك جميل

حكاية التخفيض دى عجبتنى جدا .. الله ينور عليكى .. طب انت كنتى فين لما اشتريت بستميت جنيه كتب يوم السبت اللى فات

noury يقول...

اوشن آيز الجميلة
..................

والله يا بنتي انتي وحشاني مووووووووووووووووووووت

ميرسي يا قمر علي الكلام الحلو ده

وعايزين نبقي نشوف جديدك دايما

تحياتي

noury يقول...

اوشن آيز الجميلة
..................

والله يا بنتي انتي وحشاني مووووووووووووووووووووت

ميرسي يا قمر علي الكلام الحلو ده

وعايزين نبقي نشوف جديدك دايما

تحياتي

noury يقول...

احمد منتصر
...........
ومازلت شقية حتي الان

تشرفت بمرورك

تحياتي

noury يقول...

ابو العساقيل
..............
ياااااااااااه بستميت جنيه بس؟؟

دي بسيطة خالص

هههههههههههههههههههههههههههههه

انا بشتري بخمسمية بس

اشكرك علي مرورك الكريم

تحياتي

oceaneyes يقول...

ايه يا نور ؟؟

انتى فين يا بنتى ؟؟؟

مختفية كدة بقالك يجى قرن ولا حاجة ؟؟؟

ياااااااااارب تكونى كويسة

ابقى طمنينى عليكى يا بنتى