الخميس، نوفمبر 08، 2007

سكوووب...حسرة عليهم يا حسرة عليهم

اولا:انا بعتذر بشدةلتأخري الفظيع ده بس والله مش بايدي ...كله بسبب المدعوقة الكيمياء ..اصله كان عندي ميد تيرم...يلا اهه امتحان وعدي
ثانيا: ندخل في موضوع البوست بقي
احم احم
استكمالا لكلامنا في البوست اللي فات ..موعدنا الان مع
عم حمدي عامل المشرحة وهو بيعدم الحمار
ندخل في المفيد يا سادة
المشهد
نوران كانت بتراجع في المشرحة زي اي يوم أحد عادي،واذا بها تنظر الي باب المشرحة الخلفي لتجد طابورا من الحميرتستقبلهم حجرة الاعدام بكل ترحاب وسعة صدر...وبدا الموضوع كالاتي
طبعا بس عشان تبقوا معايا في الصورة احنا هنا هنعدم الحمار مش هندبحه هااا هناك فرق
"يعني عم حمدي بيقوم جاي عند رقبة الحمار ويقوم قاطع" الشريان السباتي
اللي بنسميه
common carotid artery
اه ده اسمه يا جماعة...المهم بيقطعه ليه؟
عشان ده الشريان اللي بيبقي جاي من الاورطي عشان يغذي الدماغ،فبنقطعه ونخرج طرفيه خارج الرقبة عشان الدم يصفي ويدوخ الحمار ويمووت و
هــــــيــــــــــــــــــــــــــــــــــــــــــــــــــــــــــــــــــــــــــه
زقططوا ياعيال في جثة جديدة لانج عم حمدي عدمها دلوقتي
بعد كده بنقوم نحقن في الشريان السباتي اللي قطعناه ده فورمالين وبعديها بشوية نقوم حاقنين مادة في نفس الشريان لونها احمر اسمها الليتك" عشان بتميز الشرايين عن الاوردة"
وكمان مش عارفة فين بالظبط بيحقنوا مادة لونها ازرق دي اللي بتميز الاوردة عن الشرايين
وبعد كده عم حمدي يقوم شادد الساطور بتاعه ويقوم مقسم الجثة بقي اللي دماغ ورقبة ...واطراف امامية واطراف خلفية... وصدر وبطن
وبعدين بقي المعيدين يشوفوا شغلهم يشرحوا العينات ويجهزوها وهكذا
ممكن اكون ذكرت حاجة قبل حاجة يعني مقولتش بالترتيب ...بس ده عشان انا شفت الكلام ده السنة اللي فاتت
فانا بعتذر مقدما
لكن العملية الاعدامية ككل مظبوطة ومفيهاش حاجة غلط
بس بجد حقيقي عم حمدي عامل المشرحة بيتعب جدااااااا ،وتقريبا الفورمالين اثر علي دماغه لانه دايما بيغني وهو ماشي
هو طبعا في عمال تاني غيره بس انا ذكرته لانه هو اللي بتعامل معاه يعني اما اكون عايزة عينة معينة بروح اقوله هو
كان نفسي اجيبلكم صورة للمشرحة بس للاسف مش عندي كاميرا
طبعا انا عارفة انه انا اللي هتعدم دلوقتي بسبب القرف اللي سببتهولكم بس خلاص افرحوا...مفيش قرف تاني
مع اني بفكر اعمل مدونة كاملة عن المشرحة...هههههههههههههههههه

10 اللي شاركوني منظاري:

O S A M A يقول...

ايه دا يانوران

مش حرام كده تموتوا الحمار ودموا ستصفي

انا قريتها وانا داخل انام

والصراحه مش عارف شكلى مش هنام بالطريقه دى

بس تعرفي عرفت حاجات مكنتش اعرفها قبل كده

يالا ربنا يعينك وتخلصي بقي الكليه والحاجات الصعبه دى

ربنا يوفقك

وشكرا على المعلومات

تحياتى

عمرو وجيه يقول...

اظاهر كده المشرحة ماثرة معاك يا نوران


مع انى اصلا نسيت ان عندى مادة اسمها تشريح


اصل البايو و الفسيولوجى عملينلى دماغ جامدة قوى



و الحمد لله حليت كويس فى الامتحان




بالنسبة بقى لعم حمدى


و الله بيصعب عليا جدا


تعرفى ان عمال قسم التشريح معظمهم اذا مكنش كلهم يعنى بيعانوا من مشاكل و تليف والتهابات فى الكبد


بسبب الفورمالين




ربنا يحفظنا ويشفيهم



..................

oceaneyes يقول...

ايه ده ؟؟؟؟؟؟؟؟؟؟!!!!!!!!!!

ايه اللى بيحصل فى البلد ده ؟؟؟؟؟؟؟؟

حراااااااااااااام


ليه كدة بس ...ذنبه ايه الحمار البرىء ده ...تصدقى بالله انا بحمد ربنا وببوس ايدى وش وضهر ان انا الحمد لله لا دخلت لا طب ولا صيدلة ولا العك ده كله

ده انا لما بشوف نقطة دم بدوخ بجد

.....

وبعدين تعالى هنا يا نوران ...انتى بعد كل ده وكل المشاهد المؤثرة دى ولسة بتحبى المشرحة واللى بيحصل فيها

....

ربنا يكون فى عونك يا عم حمدى يا رب ....مع ان واضح انه راجل قلبه حديد ما شاء الله ...

....

انا خلاص قررت اكتب وصيتى عشان مش هاضمن نفسى لما ادخل عندك هنا ممكن يجرالى ايه

وعلى الرغم من كل الاوجاع اللى حاسة بيها دلوقتى ...فأنا بعترف ان المدونة دى ممتعة برده ...كملى يا بنتى ...كملى واحنا وراكى ...الله اعلم لفين ...بس كملى

.....

وشدى حيلك فى الامتحانات ...عايزين تقدير حلو ان شاء الله

.....

تحياتى

:)

تامر الحسيني يقول...

بعيدا عن عم حمدي
النموزج الطيب للمصري الاصيل
انا بصراحه صعبان عليه الحمار قوي

تخيلو يا جماعه احساسه ايه وهو داخل خده لقضائه
اكيد لو حد فينا مكانه هيحس باحساس مؤلم قوي
وعايز اسئلك يا نوران
هو الحمار حس انه هيتدبح
ولا عم حمدي راف بحاله
ومش حسسه بكده

ارجو التوضيح
مع تحياتي

noury يقول...

اسامة
.....
هو ده اللي كنت عايزاه بالظبط

انكم تعرفوا حاجات مكنتوش تعرفوها قبل كده

بعني سكووبي شغال صح

ويا سيدي ان جات علي نومة فاهو كابوس وهيعدي

وبعدين ما انا قلت خلاص انه مفيش رعب تاني

الا اذا................ولا بلاش

شكرا ع المتابعة

وتحياتي

noury يقول...

عمرو وجيه
......

فعلا واضح ان المشرحة ماثرة عليا

ده انا السكشن اللي فات كنت بمووت من الفورمالين ، وعينيا كانوا بيوجعوني خالص،ومكنتش مركزة كمان بسبب امتحان الكيمياء بس الحمد لله الامتحان كان كويس

الظاهر انت كمان جالك شيت 7 عشان ده اللي جالي وكان سهل وحلو

اما حكاية ان العمال عندهمامراض بالكبد وكده فانا اول مرة اعرف الصراحة
كان الله في عونهم بجد

شكرا علي المرور

تحياتي

noury يقول...

اوشن ايز الجميلة
.....

يابنتي ما انا كنت زيك كده في الاول بخاف من الدم والجثث والحاجات دي

بس تقولي ايه بقي الواحد اتعود خلاص

وبعدين خلاص يا اوشن مفيش اوجاع تاني والحمد لله انا قفلت علي موضوع المشرحة ده معاكم نهائي مش هجيب سيرتها عشان انتوا بتخافوا

يللا بقي زقططي وافرحي وبوسي ايدك زي ما انتي عايزة

وبجد متشكرة ليكي والله خالص خالص

وايوة كده دعواتك معانا

وربنا يسهلهالنا كلنا في الامتحانات

تحياتي يا قمر

وخدي البوسة دي..اممممووووووووووووة

noury يقول...

تامر الحسيني
......
والله مش عارفة اقولك ايه

الحمار اصلا بيكون مسالم جدا

والظاهر كده ان عم حمدي مش بيحسسه بحاجة

ما هو بقاله باع طويل في العملية دي

بس يا جماعة اوعوا يجي في بالكم انه الحمير دي بتكون سليمة يعني مش عيانة

لا دي بتكون تقريبا مريضة يعني وبتعاني من مشاكل واكيد مش قادرة تشتغل عشان كده بيجيبوها المشرحة

واهه تستريح برضه من الام المرض

تحياتي ليك

وشكرا ع المرور

فى القلب يقول...

من فضل الله انه لا توجد كاميرا

ينفع ننط على موضوع تانى غير موضوع الحمار لأنى بحبه اوى و فعلا قلبى و جعنى جاااااااااااامد عليه

noury يقول...

في القلب
....

هنط ان شاء الله علي موضوع تاني

قريب جداااااااااااااااا

اسعدني مرورك جدااا