الجمعة، نوفمبر 16، 2007

امتحاناااااااات.....وهتعدي

لمدة شهرين اتنين بس مش اكتر ولا اقل
سوف اتغيب عن المدونة
وذلك لظروف قهرية بحتة الا وهي .....الامتحانات اللي مبتخلصش
وابقوا خدولي غيابي
هتوحشوني بجد كلكم
سلاااااااااااااااااااااااااااااااااااام
ونتقابل بعد شهرين باذن الله
ومتنسوش تدعولي
نوران

الخميس، نوفمبر 08، 2007

سكوووب...حسرة عليهم يا حسرة عليهم

اولا:انا بعتذر بشدةلتأخري الفظيع ده بس والله مش بايدي ...كله بسبب المدعوقة الكيمياء ..اصله كان عندي ميد تيرم...يلا اهه امتحان وعدي
ثانيا: ندخل في موضوع البوست بقي
احم احم
استكمالا لكلامنا في البوست اللي فات ..موعدنا الان مع
عم حمدي عامل المشرحة وهو بيعدم الحمار
ندخل في المفيد يا سادة
المشهد
نوران كانت بتراجع في المشرحة زي اي يوم أحد عادي،واذا بها تنظر الي باب المشرحة الخلفي لتجد طابورا من الحميرتستقبلهم حجرة الاعدام بكل ترحاب وسعة صدر...وبدا الموضوع كالاتي
طبعا بس عشان تبقوا معايا في الصورة احنا هنا هنعدم الحمار مش هندبحه هااا هناك فرق
"يعني عم حمدي بيقوم جاي عند رقبة الحمار ويقوم قاطع" الشريان السباتي
اللي بنسميه
common carotid artery
اه ده اسمه يا جماعة...المهم بيقطعه ليه؟
عشان ده الشريان اللي بيبقي جاي من الاورطي عشان يغذي الدماغ،فبنقطعه ونخرج طرفيه خارج الرقبة عشان الدم يصفي ويدوخ الحمار ويمووت و
هــــــيــــــــــــــــــــــــــــــــــــــــــــــــــــــــــــــــــــــــــه
زقططوا ياعيال في جثة جديدة لانج عم حمدي عدمها دلوقتي
بعد كده بنقوم نحقن في الشريان السباتي اللي قطعناه ده فورمالين وبعديها بشوية نقوم حاقنين مادة في نفس الشريان لونها احمر اسمها الليتك" عشان بتميز الشرايين عن الاوردة"
وكمان مش عارفة فين بالظبط بيحقنوا مادة لونها ازرق دي اللي بتميز الاوردة عن الشرايين
وبعد كده عم حمدي يقوم شادد الساطور بتاعه ويقوم مقسم الجثة بقي اللي دماغ ورقبة ...واطراف امامية واطراف خلفية... وصدر وبطن
وبعدين بقي المعيدين يشوفوا شغلهم يشرحوا العينات ويجهزوها وهكذا
ممكن اكون ذكرت حاجة قبل حاجة يعني مقولتش بالترتيب ...بس ده عشان انا شفت الكلام ده السنة اللي فاتت
فانا بعتذر مقدما
لكن العملية الاعدامية ككل مظبوطة ومفيهاش حاجة غلط
بس بجد حقيقي عم حمدي عامل المشرحة بيتعب جدااااااا ،وتقريبا الفورمالين اثر علي دماغه لانه دايما بيغني وهو ماشي
هو طبعا في عمال تاني غيره بس انا ذكرته لانه هو اللي بتعامل معاه يعني اما اكون عايزة عينة معينة بروح اقوله هو
كان نفسي اجيبلكم صورة للمشرحة بس للاسف مش عندي كاميرا
طبعا انا عارفة انه انا اللي هتعدم دلوقتي بسبب القرف اللي سببتهولكم بس خلاص افرحوا...مفيش قرف تاني
مع اني بفكر اعمل مدونة كاملة عن المشرحة...هههههههههههههههههه

الجمعة، أكتوبر 26، 2007

سكووووب ...المشرحة

ذلك المكان الذي تسكنه دائما تلك الرائحة الذكية ،نعم ...انها رائحة الفورمالين مختلطة برائحة الجثث المحفوظة ،تلك الرائحة التي تجعلنا ندمع طيلة وجودنا في ذلك المكان العريق،والتي لا تسلم انوفنا وحلوقنا منها ايضا...
قبل ان ادخل ذلك المكان منذ سنة فائتة ،كنت شغوفة بان اراه وان اري ما بداخله ،وبعد ان دخلته اصبحت من مدمنيه،فقد كنت دائما اكرس اربع ساعات متواصلة من يوم الاحد للمكوث في ذلك المكان التهم بيانات الجثث حتي تثبت في ذهني ،وكنت في بعض الاحيان اتخذ دور الدكتور واشرح لزملائي ،ويالها من اسماء مجعلصة لكن علي مين ،حقيقة احب مكان الي قلبي في تلك الكلية .....المشرحة
دي كانت كده مقدمة بسيطة عن حبيبتي المشرحة
اللي هينقطني بقي ..انه الحيوان الموديل بتاعنا اللي المفروض بندرس عليه في التشريح هو الحصان..لكن اللي بيحصل يا سادة اننا بندرس العملي في المشرحة علي الكائن ابن عمه اللي هو الحمار...يعني الكلية مش قادرة توفر لنا حتي حصانين!!!ندرس عليهم،ما علينا دي حاجة بسيطة وهينة بالنسبة للي بيحصل جوا المشرحة ...تخيلوا يا سادة لما نتكلم عن حالة الجث اللي موجودة في الموضوع ده بقي حدث ولا حرج عينات متهالكة وعفي عليها الزمن وكل ده بسبب انه زملائنا من بقية السكاشن بيبهدلوا العينات والجثث واحنا ياعيني اخر سكشن بياخد في الاسبوع فبتبقي الجثة حالتها يرثي لها وندرس عليها وهي بايظة والدكتور يقولنا معلهش تخيلوا معايا ان المنطقة دي موجودة
والنبي ايه ...هنقعد احنا نتخيل.
الكلام ده السنة اللي فاتت
السنة دي بقي
نفس الكلام كان عندنا الاسبوع اللي فات سكشن هناخد فيه "المخ واللسان وسقف الحلق" وجات الدكتورة لسه بتقول ياهادي في المخ وبتقول اول بيان لقيناه مش موجود ايه اللي حصل ...الزملاء المصونين من السكاشن الاخري قاموا بالتهامها اقصد بقطعها...واللله حرااااااااااااااام،مفيش غير العينة دي للمخ اللي متوفرةفي المشرحة ..كلية فقيرة لهذه الدرجة
بس حقيقي بالرغم من كل السلبيات اللي في المشرحة الا اني بحبها جدااا ،وهزعل السنة الجاية لانه مفيش تشريح ...هو احنا عندنا بندرسه سنتين بس
ما علينا
معلهش قرفتكم معايا بس استحملوا
عشان المرة اللي جاية في سكووووب روعة عن طريقة الاعدام للحيوانات او بمعني اصح للحمير اللي بتدخل المشرحة
سلام بقي عشان رايحة اسن السكينة

الأربعاء، أكتوبر 24، 2007

STP


ايوة يا جماعة بالظبط كده


انا اتقبلت في كورس ال

STP


متتصوروش كانت فرحتي قد ايه لما كلمني واحد منهم في التليفون وقاللي

you are accepted in (IRA) work shop

اللي هو الاعلانات والدعاية وسبحان الله انا كنت كاتباها اول ورشة عمل عايزة اخدها،واتقبلت فيها الحمد لله

ياااااااااااااااااااااااااااااااااااااااااااه حقيقي حاجة جميلة فعلا


الكلام ده كان الخميس اللي فات ،وحضرت حفلة الاستقبال يوم السبت وبعدين اخدنا ورشة عمل بس سريعا لان الوقت كان متاخر اتعرفنا فيها علي الطلبة اللي هيكونوا معانا فيها وهيدربونا وكده يعني


وان شاء الله كل سبت هيبقي فيه ورشة عمل لمدة اربع ساعات


ادعولي يا جماعة احسن انا كده هبقي مطحونة اشد طحنة الكلية وتعبها بمحضراتها وسكاشنها وورش عمل ستب

الاثنين، أكتوبر 15، 2007

سكوووب .. ارحموها بقي

معظم الشباب دلوقتي بسمعهم بيتكلموا كلام والفاظ غريبة جدا وغالبا بتبقي مش مفهومة الا للي بيتكلموا بيها بس ،ومن كتر ما انا هتجنن"بعد الشر عليّا"قلت ادخل في حوار مع شلة لعل وعسي افهم هما بيعملوا كده ليه،وياريتني ما دخلت
انا:ايه ده!!!ايه ياجماعة الكلام الغريب ده ؟ انتوا بتقولوا ايه؟
الشلة : ايه يانجمة،انتي مش عايشة في الدنيا ولا ايه؟
انا : نجمة؟!!! هو انا بقيت نجمة وانا معرفش !!،لا يا جماعة انا قصدي ايه الالفاظ الغريبة اللي انتو بتقولوها دي؟
الشلة : ما هو زي ما تقولي كده احنا شباب في قلب بعضينا ،فاهمين الكلام اللي احنا بنقوله ،ومستمتعين بيه،وبعدين متعكريش الكلمتين اللي احنا كنا بنقولهم
انا : تفتكروا فعلا انتوا كده مستمتعين؟ ، يبقي بتضحكوا علي نفسكوا مش عليّا ،وبعدين انتوا بكلامكوا ده هتمحوا الفاظنا المصرية مش هقول العربية ،انتوا ممكن بالفاظكوا دي تعملوا ابادة للهجة المصرية
الشلة : يا حاجة ،فيها ايه لما نقعد مع بعضينا ونفرفش كده بكلمتين لذاذ ، ونفك شويتين ، وبعدين شكلك كده مش هتخلصي من الحوار بتاعك ده ، انتي كنتي عاوزانا في حاجة ؟
انا : ( باندهاش ) :انا ؟ لاااااااااااااااااااا، ابداااااااااااااااااااااااااااا،انا كنت بسلم عليكم مش اكنر
الشلة : طب سلاموزة بقي ، اخ ،معلهش نسينا انك مالكيش في الكلام ده ، سلاموزة يعني (باي-سلام -مع السلامة ) فهمتي يا حاجة
وتركتني الشلة وذهبت ومازال علي وجهي علامات الذهول والاندهاش
طبعا الحوار ده من وحي خيالي ، لكن نصف الحوار اللي هما الشلة اكيد بيحصل كل يوم ، وكمان النصف التاني اللي هو انا حقيقي لاني بهري في نفسي كل يوم وبعاني من الشلل دي اللي هتجيبلي شلل من نوع " الحالة ميئوس منها ومفيش علاج وهتمشي بكرسي متحرك"،وهو انا هستني لحد اما امشي علي كرسي متحرك ؟ علي الاقل الواحد ياخد بالمقولة اللي بتقول الوقاية خير من العلاج
ياشلة يوووووووووووه ، قصدي يا شباب مش تحضر مننا ابدا اننا نتكلم بالطريقة دي ، متهيالي لو استمرينا في كلامنا باللهجة دي ، يبقي قول علي اللهجة المصرية يللا السلااااام
ومش عايزة اسمع من حد فيكم بيقول عليّا اني بتكلم بلغة الشعارات والهتافات.
لأ،حقيقي انا بتكلم من منطلق الخوف علي لهجتنا المصرية من الاندثار ومش بعيد الاختفاء
بجد اتمني من كل واحد فينا انه يحاول يقلل من استخدامه للالفاظ دي..احسن بجد انا ممكن اتشلّ
يرضيكوا يا جماعة امشي بكرسي متحرك؟!!!معتقدش؟

الخميس، أكتوبر 11، 2007

سكوووووووب ....الميني باص


المواصلة المصونة

بالطبع كلنا تعرضنا لمثل هذا الموقف ...الا وهو ركوب المواصلة المصونة"الميني باص" ،ومن المؤكد انه يحدث معك خلال الربع ساعة او النصف ساعة والتي تقضيها في ضيافة المواصلة المصونة مواقف لها العجب،بدءا بعملية الركوب بعد ما تكون رجل برة ورجل جوة ،والسواق ما يستناش ويمشي علطول ،مرورا بالزحمة والخنقة ،وانتهاءا بوصولك للمكان المنشود ،بعد ما تكون رددت في سرك "حسبي الله ونعم الوكيل" 500 مرة تجاه السواق او التباع.
وللحق يعتبر هذا النوع من المواصلات بيئة مناسبة لافتعال المشاكل والخناقات وخصوصا في ظل الزحمة الرهيبة اللي ممكن تكون من نصيبك لما تركب الميني باص ،ويا سلاااااام لما تكون راحت عليك نومة وتصحي علي صوت اجش "مش في كل الاحوال" بيصحيك ويقولك "الاجرة" ،وياعيني لو كانت الاجرة 65 قرش ولا جنيه وشلن ،تحتاس بقي عشان تدور علي البريزة ولا الشلن وفي الاخر ما تلاقيش ،تقوم تتنرفز وتبدأ المشكلة ،وبتاع الاجرة ما يتنازلش حاكم شعارهم معروف "الشلن قبل الجنيه" وفي هذا التوقيت وفي عز الخناقة ما هي مشعللة ،يظهر واحد ربنا بعتهولك من السما ..تظهر عليه سمات الطيبة والهدوء والوداعة ،ويقول خلاص انا اللي هدفع الشلن،وبعد ما تهدي الخناقة والنفوس تكون هديت واتصافت ،تلاقي العربية اتهبدت هبدة ،وتبدا المشكلة من جديد بس المرة دي مع السواق ،ومش هتلاقي بقي ساعتها الشخص الوديع الهادي اللي بيدفع الشلن او البريزة ،وبعد ما تهدي المشكلة تفاجئ بانك لازم تنزل دلوقتي ،وحظك بقي انك قاعد في آخر العربية ،يعني المشوار قدامك طويل عشان توصل للباب ،فتستعين بالله علي هذه المهمة الشاقة ،وتعبر الطرقة في وسط الزحمة ،وكأنك غريق تحاول الوصول الي الشاطئ، ومازال التباع بيقول "آخر الطرقة والنبي يا حضرات في واحد نازل.. وسعوا لنفسكم شوية عشان الناس اللي طالعة تركب" وطبعا متنساش الاعاقات الكتير اللي هتقابلك يا اما رجل واحد ،او شنطة محطوطة في وسط الطرقة،الي ان تصل الي الباب وتنزل وتتنفس الصعداء وتقول في نفسك"ياااااااااه ..ايه الزحمة دي ؟ ..فتبص قدامك ……… اه اتاري الراية السودا كانت مرفوعة !!!!".
من الواضح انه مهما زاد عدد المواصلات برضه هتبقي زحمة...
ومش هقدر اقول غير ربنا يصبر كل الي بيركبوا المواصلة دي وانا واحدة منهم .
وانا عارفة دلوقتي انه كل اللي بيركبوا المترو هيقولوا عليّا متحيزة..عشان مكتبتش عليهم بس ده اللي جه في دماغي ... وبعدين يا جماعة مترو ... اتوبيس ... ميني باص ...كلها زحمة
والنبي اللي يلاقي حل للزحمة دي يبقي يقوللي ...احسن انا خلاص فطست
.

الأحد، أكتوبر 07، 2007

كل شئ ممكن .. حقيقي انا سعيدة


مش عارفة ليه انتابني احساس جميل اوي بعد الانترفيو بتاع امبارح.. اول مرة اشوف نفسي جريئة كده،وبتعامل مع الناس كلها بكل جرأة وانطلاق،واروح واجي واسأل ،لحد اما جه دوري في الانترفيو،واللي خلاني اضحك علي نفسي اوي من كتر ما انا كنت جريئة سألت الولد اللي بيعمل معايا الانترفيو قبل اما نبدا وقولتله اسمك ايه،يعني المفروض هو اللي يبدا التعارف ،وبعد كده مشي الانترفيو عادي ،وكنت بتكلم بكل حرية وقلت كل اللي في نفسي،وكل حاجة كنت عايزة اقولها ،ومكنتش خايفة،ومكنتش مكسوفة او محرجة كنت برد علي الاسئلة باجابات غير متوقعة لدرجة انه كان بيسالني ويقولي ليه؟ ،وعلي فكرة ده كان اول انترفيو حقيقي اعمله في حياتي،وبعد اليوم ده حسيت ان كل حاجة ممكن تتحقق،يعني انا كنت دايما بتضايق من كسوفي وخجلي،لكن بعد اللي حصل امبارح وجدت ان كل شئ احنا عاوزينه ممكن يتحقق ،بس المهم الارادة،وفضلت افكر بعد كده في الحاجات اللي كنت حاطاها في مخططاتي ومنت بقول عليها هتتحقق ازاي دي،بس دلوقتي خلاص كل شئ ممكن.... حقيقي يا جماعة كل شئ ممكن

بجد انا بشكر ربنا علي اليوم الجميل ده،حتي لو منجحتش في الانترفيو يكفيني بس اني عرفت انه نوران جريئة بس ماكنتش تعرف ،وانه بعد كده مش لازم ابقي خايفة او مكسوفة


بس خلاص


اه .... ده كان بس كده مقال استثنائي في الفترة لحد يوم عشرة اكتوبر لاني بجد حسيت انه لازم اللي جوايا ده يطلع

الاثنين، أكتوبر 01، 2007

..............اني اعترف

لحد دلوقتي وانا باعترف اني محققتش الهدف المرجو من عنوان مدونتي
Scope
سكوب يعني منظار يعني اكيد اي حاجة بشوفها قدامي لازم اعمل عليها سكوووب واحاول اتكلم عليها معاكم واقربهالكم واتناقش فيها معاكم
في بعض الاحيان هيكون بصورة هزلية والبعض الاخر هيكون بصورة جدية
وانا بعترف كمان اني كنت مقصرة في حق المدونة بس ده والله كان بسبب انشغالي في الفترة اللي فاتت بشغل الاسرة وكمان بشغلي في
الاذاعة (ممثلة في برامج الاطفال) وكمان دخول الدراسة والكلية وقرفها،وحالتي اللي يرثي لها من السكاشن والجري عشان الحق المحاضرات وحوارات غريبة كده
لكني كمان الفترة اللي فاتت عرفت مدونات كتير وعرفت انه قد ايه في ناس فعلا بجد فكرها عالي ودماغها جااامدة جداوقد ايه هما بيحبوا يدوا لمدوناتهم اكتر يمكن ما يدوا لنفسهم ،وده حقيقي معني الانتماء الصحيح
لما فكرت اني اعمل مدونة ما كنتش عمري قبل كده فكرت اني اعملها او كنت حاطها ضمن مخططاتي لاني ببساطة مكنتش اعرف ايه هي المدونة ولا سمعت عنها ،لكن لما توغلت في العالم ده وشدني ليه وانجذبت بقوة لكل شئ فيه ،استهوتني فكرة انشاء مدونة خاصة بيّا ،حتي كمان عنوان المدونة جه كده لوحده بالصدفة لكن كونتله بعد كده رؤية وهدف محدد ومعين وده اللي هبداه معاكم ان شاء الله ابتداءاً من العاشر من اكتوبر الجاري باذن الله ومتسالونيش ليه ده يا جماعة وفقا لخطة معينة انا ماشية عليها وادعولي انها تتحقق كاملة باذن الله
واخيرااااااااااااا
اتمني بجد اني فعلا اكون عند حسن ظن كل اللي بيقروا مدونتي ،ويلاقوا فيها كل اللي بيفكروا فيه ان شاء الله
التوقيع
المجنونة نوران

الاثنين، سبتمبر 10، 2007

حلم بيكبر وبيتحقق شيئا فشيئا...طالما احنا عندنا الارادة

بجد يا جماعة الاسرة بتاعتنا مش عارفة اقولكم ايه ...انا فعلا حاسة اننا ان شاء الله هنقدم حاجات جاااااااامدة جدا....وخصوصا انه معانا في الاسرة ناس ما شاء الله عليها دمااااااااااااااااااااااااااااغ...وبتفكر صح وبتفكر لقدام....وبجد حاسة الايام دي بنشاط ملحوظ لينا،واجتماعات وخطط واهداف ورؤي ..وحاجات كده جامدة ...وانا في اجتماع الاسرة بحس اني قاعدة في اجتماع لشركة كبيرة وقاعدين بنتناقش وبنفكر...وانا بتكلم مع اي حد من الاسرة وانا بتناقش مع اي عضو في الاسرة عن اي شئ يخص اي شئ في الاسرة بحس ان احنا بنعمل حاجة كبيرة قوي ولما تخرج للنور اكيد الحاجة دي هتفيد الطلبة اوي....
واول امتحان حقيقي لينا بعد نزولنا يوم الكشف الطبي ...هو يوم حفلة استقبال الطلبة (طلبة سنة اولي) اللي زي العسل ادعولنا يا اللي كل اللي بيقروا المدونة انه ربنا يوفقنا في اليوم ده
بجد احنا تعبنا كتير
كلنا بلا استثناء

السبت، أغسطس 25، 2007

لاول مرة

لاول مرة في حياتي اشعر بهذا الاحساس الفظيع الجميل، لاول مرة باحس اني عضو فاعل في المجتمع ، لاول مرة باحس اني عملت حاجة
هتفيد الناس،اصله انا ياجماعة اصبحت عضوة في اسرة عندنا في الكلية اسمها "سمارت فيتس" وكان مطلوب مني اني اعمل حاجة معينة
خاصة بسنة اولي ،وعملتها والحمد لله،عملتها كويس وعجبت مقرر الاسرة،وانا بصراحة باعتبر ان ده انجاز لاني اشتركت جديد في
الاسرة وقدرت احقق حاجة ،وكمان لانه من زمان وانا نفسي اشارك في عمل تطوعي اقدر من خلاله اني افيد الناس ،واشتراكي في الاسرة
هقدر من خلاله اني افيد الطلبة اللي اصغر مني ،واتمني ان الاسرة اللي انا فيها تخرج برة اسوار الكلية وتبقي من اشهر الجمعيات التطوعية
في مصر .قولوا
آآآآآآآآآميييييييين

الأحد، يوليو 22، 2007

يومياتي الصيدلانية

احم......احم
هنا هاحكيلكم المواقف اللي بتحصل معايا في الصيدلية
آه نسيت انكم ماتعرفوش اني بانزل ادرب في صيدلية جنب البيت
النهاردة اول ما روحت جت واحدة عاوزة تاخد حقنة ....طبعا اول ما عرفت اني انا اللي هديها الحقنة اتخضت ،اصل انا كل اللي يشوفني يقوللي انتي اخرك اعدادية،وان شكلك ما يديش جامعة خااااااااااااااااالص،بصراحة ناس مبالغ فيها....ما علينا المهم الست قالتلي اوعي تكوني لسة هتتعلمي فيا قولتلها ما تخافيش انا اديت حقن قبل كده،المهم اديتلها الحقنة وقولتلها حسيتي بحاجة،قالتلي ابدا انتي ايدك خفيفة وانتي وانتي وانا هاجي اخد الحقنة عندكم علطول وانتي اللي تديهالي،ياسلاااااااااااااااااااام الواحد ساعتها كان قد ايه فرحان
بس بعدها بشوية حصل موقف مش ولابد
جه ولد عاوز دواء شرب اسمه كيبوركس ده مضاد حيوي المهم انا عارفة مكانه وكل حاجة ورحت اجيبه قمت جبت دواء تاني بس علبته شكلها قريب اوي من علبة الدواء اللي الولد عاوزها......بس الحمد لله الولد اللي واقف معايا نبهني للعملة الهباب دي وغيرت العلبة
بس بيني وبينكم انا ساعتها كنت عاوزة انام
يللا ما علينا
المهم انا بكرة اجازة فانتظروا المواقف اللي هتحصل بعد بكرة ان شاء الله
سلااااااااااااااااااااااااااااااااااااااام مؤؤؤؤؤؤؤؤؤؤؤؤؤؤقت

الخميس، يوليو 12، 2007

يا نااااااس يا هوووووو


معلهش هانبدأها كده

ليه كل الناس فاكرين ان البيطريين دول مجرد دكاترة بهايم وبس ،لا ياجماعة متفهموش الموضوع غلط الطب البيطري ده

هو طب المحافظة علي صحة الانسان ،يعني لما نراعي صحة الماشية والاغنام والدواجن والاسماك اكيد احنا كده بنحافظ

علي صحة الانسان،لما نكافح اي مرض مشترك بين الانسان والحيوان زي انفلونزا الطيور او سارس او الحمي القلاعية

وغيرها من الامراض يبقي اكيد بنحافظ علي صحة مخلوق واحد من اللي عايشين علي الارض اللي هو البني آدم،ياجماعة

بلاش صيغة الاحتقار اللي بتعاملونا بيها دي احنا والله ناس عاديين مش جايين من عالم تاني كفاية عليكوا قوي كده المرة

الجاية ان شاء الله استنوني مع انفراد جديد للبياطرة