الجمعة، أغسطس 08، 2008

سكوووووب...مركز البيوتكنولوجي

وبعد غياااااااااااااااب طويل عن ابنتي البكرية سكووووبي ...اعود من جديد


النهاردة هنعمل فوكس عن مركز البيوتكنولوجي اللي قارفاكم بيه في حبة صمت ..المشكلة انه حبيت اعمل سيرش عنه في النت ملقيتش حاجة عنه خالص غير في موقع الكلية وكاتبين عنه سطرين يتيمين ...مع ان المركز يا جماعة بجد من اهم المراكز علي مستوي مصر كلها اللي بيتعمل فيه شغل البيولوجيا الجزيئية علي مستوي عالي ..وبيدرب الخريجين والباحثين وبيخرج منه ابحاث كتير..ده غير طبعا الكورس اللي عملوه لينا احنا الطلبة


المركز موجود في كلية الطب البيطري جامعة القاهرة ...مبني المدرجات الدور التالت علي ايدك اليمين...في احلي من كده وصف؟؟ :))

مكون من معملين وغرفة التحضير وغرفة تصوير ضوئي..ومكتب مدير المركز في اخر الطرقة وانت رايح علي قسم الفيروسات كده

اول لما دخلت المعمل فوجئت بكمية اجهزة.. مش ممكن.. وتمنها غاااااااااااااااااالي قوووووووي...واصلا احنا كنا قارفين الدكتورة اللي بتشتغل معانا في عيشتها كل شوية نسألها ايه ده يا دكتور ...طب ده بيعمل ايه..اما كنت حاسة انها خلاص هتفرقع مننا..ههههههههههههههههههههههههههههههههههه


دي الصورة الوحيدة اللي لقيتها في موقع الكلية عن المركز







علي فكرة ده يبقي دكتور جمال العيسوي ..دكتور عندنا في قسم الفسيولوجي..الجهاز اللي واقف قدامه ده اسمهCentrifuge

الجهاز ده لما بيبقي عندنا عينة وعايزين نفصل مكوناتها بندخلها فيه وندورها لمدة معينة وبعد كده بنخرج العينة وبتكون محتوياتها منفصلة عن


بعض..او لو عندنا عينة مثلا وبعض مكوناتها بتبقي لازقة في جدار الانبوبة بندخلها في الجهاز ده بحيث ان الجدار يبقي مش عليه حاجة

وكل الكمية بتاعة العينة تبقي مترسبة في الانبوبة



والبتاعة اللي ماسكها في ايده دي اسمها Pipette ودي في منها اشكال وانواع بنستخدمها في اخذ العينة او المحلول اي كان الحاجة اللي بنستخدمها بالكمية اللي احنا بنحددها ..وكل شغلنا كان بالميكرو ليتر







اخر صورة دي multi-channel pipette ..يعني بنستخدمها لما يكون معانا عينات كتير اختصارا للوقت..لو تلاحظوا ان الراجل ساحب في كل التيبس نفس الكمية بالظبط..وده طبعا دليل علي مهارة عمو اللي في الصورة ..اصلا كانت بتحصل مواقف مضحكة واحنا بنشتغل بالبيبت دي


الكورس كان مدته ستة ايام ..بجد كانوا من احلي الايام اللي قضيتها في الكلية...يكفي ان في حرية في المعاملة بينك وبين الدكتور..لانك اصلا جاي تتعلم بمزاجك ..فتقرف الدكتور زي ما انت عايز ..وهو اصلا هيتقبل رخامتك دي لانه هو كمان جاي يشتغل في المركز بمزاجه وحابب الشغل فيه



اليوم الاول



الساعة 9:51 بالظبط كنت دخلت المعمل ...بجد مش قادرة اوصف شعوري اول لما دخلت ..كان نفسي ادخله من زمان واعرف الناس دي بتعمل ايه..بعدها بشوية دخل دكتور مجدي غنيم هو دكتور في قسم الكيمياء الحيوية ..اخدنا محاضرة عن الحامض النووي ..انا كنت قاعدة بسمع المحاضرة دي للمرة الخمسين ...فطبعا اعمل ايه بقي لقيتني كل شوية بنااام ..واقوم صاحية مرة واحدة ..وانام واصحي ..انام واصحي...وفوجئت بعد الدكتور ما خلص ان مش انا لوحدي اللي كنت بنام لاااااااااااااااااااااااااااااااا ده صحابي كلهم كده ..قلت الحمد لله مش انا لوحدي...اخدنا بريك ..وبعد كده روحنا المعمل التاني واتقسمنا مجموعات ..مجموعتي كانت ستة ..واصلا احنا كنا الستة الوحيدين اللي من سنة تانية ...وكل مجموعة بيقف معاها دكتور...كانت معانا في اليوم ده دكتورة نهي ..لسة بتحضر في الدكتوراة بتاعتها ..هي في قسم الباثولوجيا الاكلينيكية...بس دكتورة طيبة اوي وزي العسل



كان اليوم ده معنييين فيه بعزل الDNA وعزلناه والحمد لله...بس ايه بقي احنا اصلا ناس واصلة عزلناه في تلات ساعات وهو اصلا بياخد تلات ايام..ههههههههههههههههههههههههههههههههه...اينعم احنا عزلناه فعلا ..وطلعنا بالنتيجة اننا شفناه بجد في الانبوبة ..بس طبعا مكانش بيور اوي ..او مينفعش يجي حد ورانا يشتغل عليه بحث..اهم حاجة ان احنا عرفنا خطوات العزل بتتم ازاي ...ودي كانت الطريقة الاولي وهي طريقة ال phenol chloroform




اليوم التاني


دخل فيه دكتور محمد وحيد ..دكتور في قسم الامراض المشتركة..كلمنا عن طريقة اخري لعزل ال DNA وهي طريقة ال Kits يعني ايه؟؟؟؟؟

يعني ببساطة الكيت دي علبة كده وفيها شوية محاليل المحاليل دي هي بس اللي هنستخدمها يعني مش هنجيب اي حاجة تاني برة الكيت دي ودي طبعا اسهل واوفر في الوقت بكتير من الطريقة الاولي بس مكلفة شوية..مش مكلفة اوي يعني الكيت الواحدة بحوالي 2500 جنية :))..ده طبعا ارخص كيت انما في كيتس تانية..بلاش اتكلم احسن


وبعدها بشوية روحنا المعمل التاني عشان نعزل الحامض النووي بطريقة الكيت ...وبعدها بقي هما كانوا محضرين DNA معزول بيور عشان نعمل عليه تفاعل ال PCR

عشان نعمل تفاعل ال PCR بنستخدم مجموعة من المحاليل والانزيمات والحاجات دي بحيث يوصل حجمها في النهاية لـ 50 ميكرو ليتر..انتوا متخيلين معايا يعني ايه 50 ميكرو ليتر ..يعني نقطة تقريبا او نقطتين...طبعا جنااااااااااااان رسمي..بس عملناه برضه وله ابيندورف مخصوصة عشان تتعمل فيه ..صغنونة اوي اوي اوي










الجهازين دول بالظبط زي اللي عندنا في المركز ..واللي فوق ده حديث جداااااااااااااااااا..بيشتغل باللمس ملوش زراير



اليوم التالت

بعد اما عزلنا الحامض النووي ..وعملنا تفاعل ال PCR المفروض بقي اننا نشوف الدي ان ايه اللي طلع عندنا ده ونعرف طوله قد ايه وهل هو فعلا ده الدي ان ايه اللي احنا بندور عليه ولا لا ....عشان كده كان لازم نعمل حاجة اسمها Agarose gel electrophoresis


اليوم ده بقي وقف معانا دكتور خالد من قسم الباثولوجيا الاكلينيكية...نفس النظام برضه دكتور متعاون وبيفهم براحة ..واشتغلنا حلو والحمد لله...وبعدها بشوية بعد اما خلصنا التجربة ..رحنا علي غرفة التصوير الضوئي عشان نشوف النتيجة بتاعة شغلنا...وقبل اما ندخل كان فيه تحذيرات جامدة جداااااااااااااااا..ليه؟؟ ...اصل احنا هنشوف الباندات بتاعة الدي ان ايه عن طريق الاشعة فوق البنفسجية..ودي طبعا اللي يتعرضلها مباشرة تعمله بلاوي متلتلة...والظاهر كده العيال صحابي كانوا عايزين يخلصوا مني اليوم ده..بالذات هالة سكشن :))






ده الجهاز اللي استخدمناه في اليوم ده


وده بقي شكل الباندات بتاعة الدي ان ايه بعد اما سلطنا عليها الاشعة فوق البنفسجية...وبالظبط كده الاوضة كانت ضلمة زي ما انتم شايفين والباندات منورة كده

اليوم الرابع بقي كان اطول يوم في الكورس ..مشينا من المعمل الساعة 8 وربع...بس بيني وبينكم كان احلي يوم ..اصل انا بحب اروح بالليل اووووووووووي ..

اليوم الرابع والخامس والسادس ..كنا بنشتغل في حاجة تانية خالص بعيدة عن ال DNA اسمها الـ serology الموضوع ده احنا بتوع تانية مكناش فاهمينه اوي عشان لسة هناخده في تالتة ان شاء الله..بس فهمنا شوية يعني الحمد لله..وفهمنا اكتر في الشغل العملي

خامس يوم نسيت نضارتي العزيزة في البيت...طبعا مقلكوش ع الحوسة اللي كنت فيها ...وطبعا كل الناس كانت متعاطفة معايا..وانا كنت حاسة في اليوم ده بالعجز...بجد ..وقعدت قدام السبورة وبرضه مكنتش شايفة كويس...بس الحمد لله اليوم عدي علي خير بدون اي خسائر.

اليوم السادس بقي كان فيه حفلة صغنططة كده المركز عملها لينا ..والعميد سلمنا الشهادات..وبعد كده كل واحد اخد طبق الحلويات بتاعه والحاجة الساقعة وفضل ياكل...طبعا طبعا سفروتة ولا خلصت الطبق بتاعها ولا الحاجة الساقعة..وده شئ مش جديد عليها وانتوا عارفين طبعا كده كويس

اجمل حاجة في الكورس اني كنت مع صحابي ..مكانش معانا حد من اللي مش بنطيقهم...اتعلمت حاجات جديدة واساسيات هتفيدني بعدين..عرفت دكاترة بجد بجد اقل ما يقال عليهم انهم محترمين اوي وطيبين اوي وعندهم علم نفسهم ينفعونا بيه

شكر لكل الدكاترة اللي شفتهم علي مدار الستة ايام

د/وحيد موسي...قسم الطفيليات ..ومدير المركز حاليا

د/وليد عواد..قسم الامراض المعدية

د/محمد وحيد...قسم الامراض المشتركة

د/عادل خليل...قسم البثولوجيا الاكلينيكية

د/مجدي غنيم..قسم الكيمياء الحيوية.... والراجل ده كان له مجهودات عظيمة افاد بيها المركز

د/خالد..قسم الباثولوجيا الاكلينيكية

د/حسين...قسم الميكرو بيولوجي

د/احمد البحيري..قسم الطفيليات

د/نهي..قسم الباثولوجيا الاكلينيكية

الحاجة بقي اللي كانت مضايقاني اوي في المركز....البلاطة المكسورة اللي في اول المعمل وانت داخل علي ايدك اليمين كده...كانت بلاطة ملخلخة كده وبتعمل صوت فظييييييييييييع...كنت بضايق منها اوي..ونسيت اكتب الملحوظة دي في ورقة التقييم في اخر يوم...اتمني انهم ياخدوا بالهم...بس متهيألي هما اتعودوا عليها

سفاريت المركز كانوا : نوران ..ايمان ..هالة .......... وطبعا كان معانا انجي ونهلة وهبة

كان معانا كمان من سنة خامسة محمد لمااااااااااااضة....بيسأل كتير اوي ...بس ما شاء الله عليه حد فاهم كويس اوي ..واخر يوم دكتور وليد قاله قوم اشرح لزمايلك اللي في سنة تانية كذا كذا...قام شرحلنا وكانت طريقة شرحه جميلة

وكان معانا برضه اية من سنة خامسة ..كانت بتحب تقعد من قدام ...ومتحبش حد يقعد قدامها..غريبة

كنا 29 طالب من خامسة ورابعة وتانية

دي كانت جولة بسيطة اوي اوي اوي وحاجة مختصرة جداااااااااااااااااااااااااااااا عن اللي حصل في الستة ايام بتوع الكورس

اتمني اني اكون افدتكم بشئ

كانت معكم

السفروتة نوران

الخميس، أبريل 24، 2008

سكوووووب...خنقونا ،خنقونا،خنقوناااااااا

خيشة....شحيبر....زعبولا

تلات شخصيات ناوين علي قضانا انا والفتيات صحباتي ...هما سفروتيات زيي علي فكرة


السيد شحيبر صديق زعبولا من زمان ،وانضم ليهم مؤخرا السيد خيشة





انا عارفة انكم مش فاهمين حاجة



نعمل فوكس اكبر




دول تلات ولاد زمايلنا في السكشن(ولو انهم ميستحقوش لقب الزمالة) ...بجد مش عارفة اقول عليهم ايه..انعدام الذوق...قمة الرخامة ...التناحة..مفيش جنتلة،تقريبا فكرهم عن البنات انهم اخرتهم الجواز والقعاد في البيت








بكره جدااااااا يوم الاتنين لانه بيبقي عندنا فيه سكشن بارا والتلاتة دول بقي بيعملوا احتلال علي الميكرسكوب ومبنعرفش نشوف العينات منهم




يقوم السيد خيشة شادد الكرسي وقاعد عليه وعمنا شحيبر وعمنا زعبولا يفضلوا واقفين وراه زي البودي جارد كده ويفضل حضرته يصور في العينة بالموبايل بتاعه قرن من الزمان ولو حب ممكن يخليهم قرنين مفيش مانع (اصل احنا عودناهم علي كده) ويطلع في روحنا علي بال ما يتعتع من علي الميكرسكوب (اصله هيكتشف حاجة جديدة)




ويتكرم علينا ويخلينا نشوف العينة


في يوم من ذات الايام (ويارتنا ما كنا بذلنا المجهود ده في الكلام معاهم)كانوا عاملين الاحتلال اياه ،تشجعنا وقولنالهم لو سمحتم عايزين نشوف العينة ....قام السيد خيشة بكل بجاحة قالنا احنا بنصور العينة....يا بجاحتك يا اخي ..يا بجاحتك ..مفيش ذوق خالص


ماشي هنعمل احنا اللي عندنا ذوق ...لفينا تاني علي عينات المعمل كلها ورجعنا للعينة دي وهما لسة واقفين ....ياسااااااااااااااااتر ...انا كان بيتهيألي اني هقلع الكوتشي واديهم بيه علي دماغاتهم ...وعمالة ااف اف وازعق ..واقول للعيال اصحابي انا لفيت عينات المعمل كلها خمس مرات وفاضل العينة دي وبتكلم بصوت عالي عشان يحسوا علي دمهم شوية ...وهما مفيش خالص..ولا حياة لمن تنادي



واللي يغيظ بقي يا سادة ..انهم دايما بيبصولنا بنظرات غريبة..كل اما نروح حتة نلاقيهم في وشنا بخلاف ولاد السكشن كلهم...وزعبولا ده عليه حتة بصة من تحت النضارة بتاعته مش عارفة افسرها علي انها نظرة احتقار ولا حقد ولا قرفان مننا ولا ايه بالظبط


طب لو انتم مضايقين مننا في حاجة ..قولولنا عليها وبلاش النظرات الغريبة دي ..بدل ما انتوا خنقتونا كده وهتجيبلونا الضغط والسكر والشلل السداسي عن قريب


طب بلاش سكشن البارا.....سكشن الفسيولوجي كان نازل فيه عينات ومعاها الكومينت بتاعها ...فانا واصحابي كنا قاعدين بنكتب كومينت احدي العينات ...وفجاة لقينا ورقة الكومينت اتشدت من عندنا وراحت في حتة بعيدة شوية ...اتاري الاخ خيشة شدها عشان يصورها بالموبايل ...انا بقي اتنرفزت وشديتها عندنا تاني....اصله بصراحة معندوش ذوق ولا قال بعد اذنكم هصورها ولا اي حاجة


المصيبة بقي ان اساميهم قريبة مننا في الكشف ...يعني لو اتحطينا في مجموعات بحثية ممكن يبقوا معانا...لااااااااااااااااا مش متخيلة الموقف ...ربنا ما يحطنا في الموقف ده ابدااااااااااا


طب افرض بعد ما اتخرجنا ان شاء الله لاقينا حد منهم اشتغل في نفس المكان اللي واحدة فينا هتشتغل فيه ان شاء الله يعني ،هتفضل نفس العداوة دي كده بينا ...المنظر مش هيبقي لطيف خاااااااااااالص...ان شاء الله مش هيحصل


بس احنا مش هنسيب الهيمنة الذكورية دي تستمر ابداااااااااااااااااااا


استعد يا خيشة انت وشحيبر وزعبولا .....السفروتيااااااااااااااااات قاااااااااادماااااااااااات



ربنا يهديهم


قولوا آاااااااااااااااااااااااااااامين




الأحد، أبريل 06، 2008

سكوووووب....اضراب 6 ابريل

يوم 5 ابريل
الساعة 11 مساءا حدثت مناقشات ومباحثات عنيفة بيني انا سفروتة من جهة ومامتي وبابايا من جهة تانية ،كل ده بسبب انهم مش عايزيني اروح الكلية يوم 6ابريل خوفا من ان يكون هناك ضرب ورشاشات مياه وقنابل دموعية واروح انا في الرجلين ، وخلصت الخناقة علي اني هروووح يعني هروووح ....ان شاء الله اموت اهو يبقي اسمي شهيدة برضه.
يوم 6 ابريل
صحيت الساعة خمسة ونص صباحا ولسة هقوم من ع السرير سمعت صوت ماما وبابا في الصالة قلت بس انا لو قمت دلوقتي هتحصل خناقة وهنلم الجيران والخناقة مش هتخلص حتي لو جابوا مزيكة حسب الله، قلت يا بت يا سفروتة خديها من قصيرها ونامي دلوقتي وبعدين ربنا يحلها وطبعا مش هاين عليا اسيب محاضرة الفسيولوجي.
الساعة عشرة صباحا كان هاتفي الخلوي يشير الي انه هناك مكالمة من "هالة سكشن" دي هالة صاحبتي ومعايا في السكشن ، المهم كلمتها وبتقولي يا بنتي تعالي ده مفيش حاجة وكمان اخدنا محاضرة الفسيولوجي،وانا بقي كنت هعيط في التليفون وهي بتقولي كده، المهم قمت بقي لبست وفطرت وصحيت بابا
سفروتة : بابا .....هات المصروف
بابا : ليه ..... انتي نازلة؟
سفروتة : ايوة عشان تعرف بس انه مفيش حاجة وكمان محاضرة الفسيولوجي ضاعت عليا
بابا : طب خلاص ...بس ابقي خلي موبايلك مفتوح عشان نطمن عليكي وبلاش سايلنت يا نوراااااااااااااااااان
سفروتة : حاضر حاضر ....بس ابقوا اتصلوا بيا بعد الساعة خمسة .. مش معقول يعني اخلي تليفوني يرن وسط السكشن واتهزأ
بابا : طيب.... خلي بالك من نفسك
سفروتة : حاضر ... سلاااام
الشارع يوم 6 ابريل
توقعت وانا نازلة اني مش هلاقي مواصلات ، والشوارع هتبقي فاضية ،لكن كان العكس تماما ، حركة السير زي ما هي ، بدءا من عندنا في امبابة مرورا بالمحكمة وشارع عرابي ثم جامع مصطفي محمود"اللي الاشارة عنده كانت شغالة تمام والعساكر بتوع المرور كانوا بيؤدوا عملهم عادي جدااااااا" ، وكمان شارع البطل احمد عبد العزيز كان عادي جداااا كل الحكاية بس ان الشوارع كانت فاضية جدااااااا ، والعربيات ماشية براحتها، لحد اما وصلنا عند الجامعة وهنا بقي المنظر مكانش لطيف خالص....عربيات الامن المركزي في كل حتة وزهرة اللوتس كانت محاطة بسور حديد كده وواقف وراه ناس كتير ، لكن حركة الطلبة كانت عادية ، والموضوع مشي هادي لحد اما وصلت الكلية في ميدان الجيزة
اللي بس عايزة افهمه ،هو وبعد الاضراب اللي حصل ده"ده اذا كان اضراب ملحوظ" هيحصل ايه ،ايه اللي هيتغير؟!!!!!
كانت معكم
سفروتة اسعد
لقطاع المدونين

الأربعاء، مارس 12، 2008

سكوووووب...مختلف

من حوالي كام سنة وانا بحب اتابع سلسلة عالم المعرفة ...واللي ميعرفش مين هي السلسلة دي...ببساطة هي سلسلة صادرة عن المجلس الوطني للثقافة والفنون والاداب بدولة الكويت......الحقيقة بتصدر عنها كتب قمة في الروعة ...سواء كانت مترجمة او غير مترجمة
النهاردة بقي في فوكس كبير هيتعمل علي كتاب من كتب السلسلة دي ... والكتاب يحمل عنوان
الفلسفة البيئية
من حقوق الحيوان الي الايكيولوجيا الجذرية
الكتاب عبارة عن مجموعة مقالات تخص البيئة والطبيعة والكائنات اللي عايشين فيها ...وهو من تحرير مايكل زيمرمان ..ترجمة الاستاذ معين شفيق رومية ،وهو صدر عام 2006 في شهر اكتوبر
والحقيقة الفوكس مش هيبقي علي الكتاب كله ..هو هيبقي علي فقرة داخل الكتاب...الفقرة دي بجد انا لما قريتها وقفت قدامها كتير جدااااااا
وكمان علي فقرة تانية لا تقل اهمية عن سابقتها
الفقرة الاولي كانت في الفصل الخامس (اخلاقيات احترام الطبيعة)
"ويظل موضع ترقب ان كان هذا القادم الجديد قادرا علي البقاء بمقدار ما بقيت الانواع الحية الاخري.لكن ثمة فظاظة في الطريقة التي ينظر بها البشر شذرا نحو الحيوانات (الادني) خصوصا تلك التي انقرضت زفمثلا نحن نعد الديناصورات فاشلة بيولوجيا علي الرغم من انها وجدت علي كوكبنا طيلة 65 مليون سنة ، وقد عبر احد الكتاب عن هذه النقطة بشكل مبسط وجميل:نتحدث احيانا عن الديناصورات الفاشلة ،اذن سيكون الوقت كافيا لاطلاق هذا الحكم عندما يمر علينا مجرد عشر مدة بقائها"
الفقرة التانية من نفس الفصل
"اذن في حال حدوث الفناء الشامل النهائي والمطلق لنوعنا البشري (وهذا ما جلبناه بايدينا) واذا لم نحمل معنا جميع الاخرين الي النسيان ،فعندها لن يتمكن مجتمع الحياة علي الارض من الاستمرار وحسب ،بل من المحتمل جداا ان ازدهاره سوف يتعزز ،باختصار ان حضورنا ليس ضروريا فلو اتخذنا وجهة نظر مجتمع الحياة واعطينا الصوت لمصلحته الحقيقة ،فمن المحتمل جدا ان نهاية حقبتنا ذات الانشات الستة ستكون موضع ترحيب عارم"
طبعا انا بتحفظ علي جملة في الفقرة التانية لكن المهم هو المعني المجمل والعام للفقرتين
رايي في الموضوع ده هيكون الاسبوع الجاي ان شاء الله
انا اللي يهمني دلوقتي رايكم انتم ياريت كل اللي يدخل يقول وجهة نظره
لانكم انتم اللي هتعملوا الاسكوب المرة دي مش انا

الأربعاء، فبراير 06، 2008

سكوب..ليتني كنت شحاتا

ايوة ... زي ما هو مكتوب كده بالظبط ،زمااااااااااااااااان كنا كلنا بنقول شحاتين السيدة ، وشحاتين الحسين
لانهم كانوا بيتمركزوا في المناطق دي علي اساس انها مناطق مباركة وبيتهافت عليها ناس كتير ، ومش
معقول الناس الكتير دي واللي هما طيبين برضه ، مش معقول انهم مش هيحنوا علي الشحاتين الغلابة
واكيد هيدوهم مما اعطاهم الله،ومازالوا برضه ياسادة الي حد الان بيتمركزوا بكثرة ،لكن دلوقتي وبفرمان
سلطاني مني انا امرنا نحن بتغيير ذلك الاسم بدلا من شحاتين السيدة الي شحاتين ميدان الجيزة.

يالهووووووووووي ،كل خطوة تخطيها تلاقي قدامك شحات ،والواحد بيبقي مش قادر خلاص ، مناظر تقطع القلب ، ويقعدوا بقي يحلفوك بالنبي والغاليين ، ويشدوك من ايدك ، وفي منهم اللي ميسيبكش الا لما تطلع الفكة اللي معاك ، وبصراحة الواحد بقي يشك فيهم ، دول شحاتين بحق وحقيقي ولا اصلا هما بيشتغلوا شحاتين ، اصل الدنيا
دلوقتي مبقاش ليها امان يا ابني بعد فيلم عادل امام " المتسول " اما كان عامل فيها شحات ومش بياخد غير بالدولار .

والحقيقة يا سادة ان الميدان اصبح مهدد في اي لحظة لانفجار قنبلة من الشحاتين ، بدل ما كنا بنقول انفجار سكاني ،لا ده كمان هيبقي انفجار شحاتين.

ااااااااااااااااااااااه ، وساعتها بقي تطلع اعلانات في التليفزيون بتطالب بتنظيم الاسرة ، قصدي بتنظيم الشحاتين
وشحات لكل منطقة ، ويقسموها ورديات ، ونعمل بقي وزارة للشحاتة ، وتدخل في ميزانية الدولة ،وساعتها بس
هيكون ليهم الحق انهم يعملوا كلية للشحاتة ،وهتاخد من 99,9 % ،او ممكن الواحد ياخدها من قصيرها وياخد
كورس في الشحاتة وهيحاضر فيه طبعا شحاتين علي اعلي مستوي ، واكيد هيبقي فيه تبادل للشحاتين بين الدول وذلك من اجل تناقل الخبرات وكل ما هو جديد في عالم الشحاتة ، ومش بعيد يتم انشاء منظمة الشحاتة العالمية ، واحتمال كبير جدا تبقي هي الراعي الرسمي لمونديال كاس العالم لكرة القدم، وهنبقي مجبرين اننا نرفع كلنا شعار " نحو مستقبل شحاتة افضل " ، ولما تسال العيل الصغير وتقوله نفسك تطلع ايه يا حبيبي ، هيرد من غير تفكير " طبعا شحاااااااااااات ".

الأحد، يناير 27، 2008

سكوووووب....نوران الطفلة

نوران:النهاردة يا جماعة فكرت اني اعمل سكوب علي نفسي


نور : ايه ده... هو انتي استأذنتيني قبل اما تعملي كده؟!!


نوران:جري ايه يا بنتي ..هو مش احنا واحد ولا ايه؟


نور : اه صحيح ..فاتتني دي..طب كملي يا أنا


نوران: معلهش يا جماعة انا بتحب دايما تتخانق معايا.. المهم يعني هحكي علي شوية مواقف كده كل اما افتكرها اضحك قوي واقول يخرب عقلك يا بت يا نوران

نور : يخرب عقلك يا بت يا نوران..هههههههههههههههههههه

نوران: ظريفة قوي ..علي فكرة الناس ابتدت تتخنق مننا

نور : اه انا حاسة كده برضه

نوران:خلاص هنبدأ اهه



(1)


بمناسبة ان معرض الكتاب بيقام حاليا ...افتكرت موقف ليا وانا صغيرة وكنت رحت مع بابا المعرض مش فاكرة وقتها كنت في اولي او تانية ابتدائي..المهم بابا كان بيشتري كتاب والله ما فاكرة عنوانه كان ايه بس هو كان كتاب في التاريخ بس اللي فاكراه بقي ان سعره كان بخمسة وعشرين جنيه..وبابا جاي بيدفع الفلوس قمت انا طلعت كده وكنت حاجة مش باينة من الارض وقلت للراجل


مفيش تخفيض؟؟؟؟


بكل براءة...قام الراجل قال لبابا طب والله عشان خاطر الامورة الصغيرة احنا هنعمل تخفيض واخدنا الكتاب ب 18 جنيه


اي حد بقي يا جماعة لو عايز تخفيض يبعتلي بس وانا اقوم بالواجب




(2)






دي وانا في ملاهي سفنكس كان عندي سنتين وقتها .. ملاهي سفنكس دي بقي تقريبا كنت مقيمة فيها...كنت بروحها كتير قووووووي

بس للاسف هي مش موجودة دلوقتي عملوا مكانها كوبري..المهم كنت فاكرة موقف كده لما رحت في يوم مع ماما واليوم ده كان الصبحية مكانش بالليل ولقيت الملاهي فاضية خالص ومفيهاش حد غير انا وماما .. المهم كنت هموت واركب لعبة الطيارة اللي بتلف كده ورا بعضيها دي وركبتها وركبت ماما معايا ..وقتها ماما كانت حامل في اخويا ..واول ما عمو شغل اللعبة وانا هيصت بقي وماما كانت حاسة انها دايخة وانا ولا انا هنا وعمالة بقي اقول لعمو زود السرعة شوية ..لحد اما سمعت صوت ماما بتقولي نورااااااااااااااااااااااااااااااااااااااااااااااااان ..كفاية انا تعبت...... والله يا جماعة اول اما افتكر الموقف ده اضحك علي نفسي جدااااا اصله انا اللي غصبت علي ماما تركب معايا ويا عيني هي مرضيتش تزعلني ... والنتيجة انها كانت تعبت جامد...بس الحمد لله اليوم دي عدي علي خير
قوية ومفترية انا

(3)
دي بقي وانا في الحضانة .. افتكر انه كان عندنا في اخر الفصل دولاب كده كبييير كنت كل يوم افتحه واقعد العب في الحاجات اللي فيه كان فيه العاب وعرايس والميس كانت بتحط فيه الزرع بتاعنا اللي كنا بنزرعه ..وكنت اقعد العب في زرع العيال وكنت مبهدلة الدنيا بصراحة
افتكر بقي انه في يوم جات الميس وقالتلنا يا اولاد في مسابقة في الرسم واحسن رسمة هتاخد جايزة ..المهم الابداع الفني ظهر وعمل عمايله معايا وقال ايه رسمت فرح ورقاصة (اه والله رقاصة) وسبت كرسي العروسة والعريس فاضي ..قال ايه لسة مجوش ..وبعد انتهاء اليوم الدراسي ماما جات تاخدني فالميس بتوريها انا رسمت ايه .زومامام تقوللي كده يا نوران ترسمي رقاصة؟؟؟؟؟ والميس تضحك وتقولها ده ابداع ....نتيجة هذا الابداع يا سادة فازت رسمتي انا بالمركز الاول علي مستوي الادارة .ززبصراحة شئ غير متوقع يعني رقاصة وفرح ومركز اول تيجي ازاي دي؟ ورحت بقي عشان اخد شهادة التقدير وسلمت علي ناس كبار قوي في الادارة وناس كده عواجيز وكان فيه
موجه لغة عربية ساعتها قعد جنبي واداني ملبسة كانت بطعم الفراولة وبعدين قالولي بتعرفي تغني ؟قولتلهم طبعاااااااا وغنيت بقي وقلبت الادارة فرح ..ههههههههههههههههه زي الرسمة
في يوم بقي الميس بتاعتنا قالتلنا انها حامل وكانت تقعد تقولنا انها هتجيب نون صغير ويكبر ويبقي قدنا ومش عارف ايه واحنا كنا نفضل نقولها احكيلنا يا ميس عن النونو ..المهم فكرت في يوم كده وقلت طب اجيب ايه للنونو بتاع الميس..وفضلت افكر افكر ...وقلت بس انا اجيب علبة عصير للنونو اهه يشربها لما يكبر....اه والله بجد انا كنت فظيعة....لا والميس ايه فرحت بيا خالص وحضنتي وباستني كمان
بتاخدني علي قد عقلي ولا ايه؟؟؟
نوران بقي لما كانت بتبقي قاعدة في البيت ...ساعات كنت اتخيل اني بقدم برنامج طبق اليوم ....وكنت اجيب كل فوانيس رمضان اللي كانت عندي وافكها واعملها بقي اكنها اطباق وكوبايات وخلاط ومش عارفة ايه...بصراحة كنت عايشة في دنيا تانية
بس حقيقي كل اما افتكر اني كنت بعمل كده كنت بقول
يخرب عقلك يا بت يا نوران

الأربعاء، يناير 16، 2008

كابتن نوران... عاد اليكم من جديد

وبعد طول غياب...اعود من جديد الي منزلي الافتراضي
يااااااااااااااااااااااااااااااااااه
بجد بجد بيتي الافتراضي وحشني قوي
وحشني شكله ... والموضوعات...والناس اللي بيزوروه
واللي ببقي سعيدة قوي لما بشوف بصمتهم عندي
وحشتوني كلكم
حقيقي مش عارفة اقول ايه
اوقات الكلام بيبقي عاجز عن التعبير
عموما ...انا فرحانة جداااااا لاني رجعت تاني للمدونة
هو بس فاضل امتحان واحد يوم السبت ان شاء الله يارب يعدي علي خير وابقي فضيت تماما للمدونة
بس انا حبيت ارجع في الميعاد المتفق عليه 16/1/2008
وبجد احب اشكر كل اللي علقوا عندي في بوست الغياب ،لاني حسيت بجد اني مش ساكنة لوحدي في بيتي وانه فيه ناس جميلة بتسال عليا
حمد الله علي السلامة يا نور

الجمعة، نوفمبر 16، 2007

امتحاناااااااات.....وهتعدي

لمدة شهرين اتنين بس مش اكتر ولا اقل
سوف اتغيب عن المدونة
وذلك لظروف قهرية بحتة الا وهي .....الامتحانات اللي مبتخلصش
وابقوا خدولي غيابي
هتوحشوني بجد كلكم
سلاااااااااااااااااااااااااااااااااااام
ونتقابل بعد شهرين باذن الله
ومتنسوش تدعولي
نوران

الخميس، نوفمبر 08، 2007

سكوووب...حسرة عليهم يا حسرة عليهم

اولا:انا بعتذر بشدةلتأخري الفظيع ده بس والله مش بايدي ...كله بسبب المدعوقة الكيمياء ..اصله كان عندي ميد تيرم...يلا اهه امتحان وعدي
ثانيا: ندخل في موضوع البوست بقي
احم احم
استكمالا لكلامنا في البوست اللي فات ..موعدنا الان مع
عم حمدي عامل المشرحة وهو بيعدم الحمار
ندخل في المفيد يا سادة
المشهد
نوران كانت بتراجع في المشرحة زي اي يوم أحد عادي،واذا بها تنظر الي باب المشرحة الخلفي لتجد طابورا من الحميرتستقبلهم حجرة الاعدام بكل ترحاب وسعة صدر...وبدا الموضوع كالاتي
طبعا بس عشان تبقوا معايا في الصورة احنا هنا هنعدم الحمار مش هندبحه هااا هناك فرق
"يعني عم حمدي بيقوم جاي عند رقبة الحمار ويقوم قاطع" الشريان السباتي
اللي بنسميه
common carotid artery
اه ده اسمه يا جماعة...المهم بيقطعه ليه؟
عشان ده الشريان اللي بيبقي جاي من الاورطي عشان يغذي الدماغ،فبنقطعه ونخرج طرفيه خارج الرقبة عشان الدم يصفي ويدوخ الحمار ويمووت و
هــــــيــــــــــــــــــــــــــــــــــــــــــــــــــــــــــــــــــــــــــه
زقططوا ياعيال في جثة جديدة لانج عم حمدي عدمها دلوقتي
بعد كده بنقوم نحقن في الشريان السباتي اللي قطعناه ده فورمالين وبعديها بشوية نقوم حاقنين مادة في نفس الشريان لونها احمر اسمها الليتك" عشان بتميز الشرايين عن الاوردة"
وكمان مش عارفة فين بالظبط بيحقنوا مادة لونها ازرق دي اللي بتميز الاوردة عن الشرايين
وبعد كده عم حمدي يقوم شادد الساطور بتاعه ويقوم مقسم الجثة بقي اللي دماغ ورقبة ...واطراف امامية واطراف خلفية... وصدر وبطن
وبعدين بقي المعيدين يشوفوا شغلهم يشرحوا العينات ويجهزوها وهكذا
ممكن اكون ذكرت حاجة قبل حاجة يعني مقولتش بالترتيب ...بس ده عشان انا شفت الكلام ده السنة اللي فاتت
فانا بعتذر مقدما
لكن العملية الاعدامية ككل مظبوطة ومفيهاش حاجة غلط
بس بجد حقيقي عم حمدي عامل المشرحة بيتعب جدااااااا ،وتقريبا الفورمالين اثر علي دماغه لانه دايما بيغني وهو ماشي
هو طبعا في عمال تاني غيره بس انا ذكرته لانه هو اللي بتعامل معاه يعني اما اكون عايزة عينة معينة بروح اقوله هو
كان نفسي اجيبلكم صورة للمشرحة بس للاسف مش عندي كاميرا
طبعا انا عارفة انه انا اللي هتعدم دلوقتي بسبب القرف اللي سببتهولكم بس خلاص افرحوا...مفيش قرف تاني
مع اني بفكر اعمل مدونة كاملة عن المشرحة...هههههههههههههههههه